کرناٹک اسمبلی میں بم دھماکے کی اے آئی ویڈیو پوسٹ کرنے کے الزام میں بہار کا 25 سالہ نوجوان گرفتار

بنگلورو: کرناٹک کے دارالحکومت بنگلورو میں ریاستی اسمبلی کی عمارت ودھان سودھا میں بم دھماکے کی مصنوعی ذہانت (اے آئی) سے تیار کردہ ویڈیو انسٹاگرام پر پوسٹ کرنے کے الزام میں بہار سے تعلق رکھنے والے 25 سالہ تارک وطن مزدور حضرت علی کو پولیس نے گرفتار کرلیا۔

اطلاعات کے مطابق ملزم نے منگل کے روز یہ ویڈیو پوسٹ کی تھی، جس میں ودھان سودھا کی عمارت میں دھماکا ہوتے ہوئے دکھایا گیا تھا۔ پولیس نے اس معاملے میں مقدمہ درج کرتے ہوئے ڈیجیٹل شواہد کی مدد سے سوشل میڈیا اکاؤنٹ کا سراغ لگایا۔

پولیس کے مطابق حضرت علی یومیہ اجرت پر پائپ فٹر کا کام کرتا ہے اور فی الحال پولیس کی تحویل میں ہے۔ حکام ویڈیو پوسٹ کرنے کے مقصد اور اس معاملے میں دیگر افراد کے ممکنہ طور پر ملوث ہونے کی تحقیقات کررہے ہیں۔