کمبوڈیا میں بھی گوگل پے اور پے ٹی ایم شروع – بھارتی مسافر 45 لاکھ سے زائد دکانوں پر کر سکیں گے ادائیگیاں

بھارت کے ڈیجیٹل ادائیگی نظام یو پی آئی  نے ایک اور اہم بین الاقوامی سنگ میل عبور کر لیا ہے۔ بھارت اور کمبوڈیا کے درمیان کراس بارڈر کیو آر ادائیگی نظام کے آغاز کے بعد اب کمبوڈیا جانے والے بھارتی مسافر وہاں 45 لاکھ سے زائد مرچنٹ آؤٹ لیٹس پر براہِ راست یو پی آئی کے ذریعے ادائیگیاں کر سکیں گے۔

اس سہولت کو NPCI International Payments Limited نے کمبوڈیا کے ACLEDA Bank کے اشتراک سے متعارف کرایا ہے۔ اس کے تحت بھارتی صارفین فون پے، گوگل پے اور پے ٹی ایم جیسے یو پی آئی ایپس کے ذریعے کمبوڈیا کے قومی کیو آر نظام ’’کے ایچ کیو آر‘‘ کو اسکین کرکے فوری ادائیگی کر سکتے ہیں۔

اس اقدام سے بیرونِ ملک سفر کے دوران نقد رقم رکھنے اور کرنسی تبدیل کروانے کی ضرورت میں نمایاں کمی آئے گی۔ سیاحتی مقامات، ہوٹلوں، ریستورانوں اور ریٹیل اسٹورز سمیت مختلف مقامات پر بھارتی شہری آسانی سے ڈیجیٹل ادائیگیاں کر سکیں گے۔

یہ منصوبہ دو مراحل پر مشتمل ہے۔ پہلے مرحلے میں بھارتی شہری کمبوڈیا میں یو پی آئی استعمال کر سکیں گے، جبکہ دوسرے مرحلے میں کمبوڈیا کے شہری بھی اپنے مقامی بینکنگ ایپس کے ذریعے بھارت میں یو پی آئی مرچنٹ آؤٹ لیٹس پر ادائیگیاں کر سکیں گے۔