سموسہ کیلئے لوکو پائلٹ کے ٹرین روک دینے کے واقعہ پر ریلوے کی وضاحت
نئی دہلی : ریلوے حکام نے سوشل میڈیا پر وائرل ہونے والی ایک ویڈیو اور اس سے متعلق کیے گئے دعوے کو مکمل طور پر بے بنیاد اور گمراہ کن قرار دیا ہے۔
حکام کے مطابق متعلقہ مال بردار ٹرین پہلے ہی ریلوے یارڈ میں طے شدہ انجینئرنگ کام کے باعث مقررہ مقام پر رکی ہوئی تھی۔ ٹرین کو کھانا خریدنے یا کسی ذاتی مقصد کے لیے نہیں روکا گیا تھا۔
ریلوے کے مطابق توقف کے دوران معاون لوکو پائلٹ کو شخصی طور پر کھانا خریدتے ہوئے دیکھا گیا تاہم اس منظر کو غلط انداز میں پیش کرتے ہوئے یہ تاثر دیا گیا کہ ٹرین کو عملے کے کھانے کے لیے روکا گیا تھا
جو حقیقت کے منافی ہے۔مزید یہ کہ وائرل ویڈیو کو غلط طور پر ایک مسافر ٹرین سے جوڑ دیا گیا جبکہ متعلقہ واقعہ ایک مال بردار ٹرین سے متعلق تھا۔
حکام کا کہنا ہے کہ ویڈیو کی منتخب تدوین اور حقائق کو توڑ مروڑ کر پیش کرنے سے عوام میں غلط فہمیاں پیدا ہوتی ہیں اور سرکاری اداروں پر اعتماد متاثر ہوتا ہے۔
ریلوے انتظامیہ نے عوام سے اپیل کی ہے کہ سوشل میڈیا پر وائرل ہونے والی کسی بھی خبر یا ویڈیو کو شیئر کرنے سے پہلے اس کی تصدیق ضرور کریں اور صرف مستند سرکاری ذرائع سے حاصل شدہ معلومات پر ہی اعتماد کریں۔
