حیدرآباد میں نقلی پولیس عہدیدار(ڈی آئی جی ) اور اس کی بیوی گرفتار، جعلی شناختی کارڈ اور پستول برآمد
حیدرآباد: خود کو پولیس کا اعلیٰ افسر ظاہر کرکے لوگوں سے لاکھوں روپے کی دھوکہ دہی کرنے والے شخص اور اس کی بیوی کو کیسرا پولیس نے گرفتار کرلیا۔ پولیس نے ان کے قبضے سے نقلی شناختی کارڈ، واکی ٹاکی، نقلی دستاویزات اور نقلی پستول سمیت دیگر سامان برآمد کیا ہے۔
پولیس کے مطابق ناگارم کے سرینواس نگر کالونی سے تعلق رکھنے والا شریدھر گوڑ (44) خود کو انٹیلی جنس محکمہ کا ڈی آئی جی بتاتا تھا۔ وہ لوگوں سے کہتا تھا کہ سکیورٹی کی وجہ سے وہ اپنی اصل شناخت ظاہر نہیں کرسکتا۔لوگوں کو یقین دلانے کے لیے وہ جعلی پولیس شناختی کارڈ، آئی پی ایس افسر کی تقرری کے جعلی خطوط، اے پی پی اے ٹریننگ سرٹیفکیٹ، تعریفی اسناد اور پولیس یونیفارم میں اپنی تصاویر دکھاتا تھا۔
اس نے اعلیٰ پولیس افسران اور معروف شخصیات کے ساتھ اپنی فرضی تصاویر بھی تیار کر رکھی تھیں۔اس کی بیوی نندنی (38) بھی شوہر کا ساتھ دیتی تھی۔ وہ لوگوں سے کہتی تھی کہ اس کا شوہر پولیس محکمہ میں کام کرتا ہے اور اعلیٰ افسران سے اس کے اچھے تعلقات ہیں۔
وہ یہ بھی بتاتی تھی کہ ان کے پاس کافی جائیداد اور مالی وسائل ہیں۔ اس طرح دونوں نے لوگوں کا اعتماد حاصل کرکے لاکھوں روپے وصول کیے۔پولیس کے مطابق شریدھر گوڑ نے ناگارم کے راجو بال کرشن سے دوستی کی۔ اس نے پہلے خود کو ایس بی آئی کا منیجر بتایا اور کہا کہ وہ جس مکان میں کرائے پر رہتا ہے اسے خریدنا چاہتا ہے اور اس کے لیے مالی مدد کی ضرورت ہے۔
اس بہانے اس نے بال کرشن سے 4.50 لاکھ روپے لیے۔ بعد میں خود کو ڈی آئی جی بتاتے ہوئے اس سے مزید 5,42,417 روپے حاصل کیے۔جب بال کرشن نے رقم واپس مانگی تو شریدھر گوڑ نے مبینہ طور پر ڈمی پستول دکھا کر اسے دھمکایا۔ پولیس کے مطابق اس معاملے میں مجموعی طور پر 12,92,193 روپے کی رقم کا معاملہ سامنے آیا۔
ایک دوسرے معاملے میں شریدھر گوڑ نے سرینواس نگر کالونی کی رہنے والی اے۔ سریتا سے 11 لاکھ روپے لیے۔ سریتا نے جب اپنی رقم واپس مانگی تو اسے بھی ڈمی پستول دکھا کر دھمکانے کا الزام ہے۔پولیس کے مطابق ان دونوں معاملات میں شریدھر گوڑ اور اس کی بیوی نندنی نے مجموعی طور پر 23,91,193 روپے کی دھوکہ دہی کی۔
پولیس کی تحقیقات میں یہ بھی سامنے آیا کہ شریدھر گوڑ کے خلاف پہلے بھی ایسے معاملات درج ہیں۔ چلکل گوڑہ پولیس اسٹیشن کی حدود میں میاں بیوی کے خلاف دو مقدمات درج ہیں۔ایک شخص کو پولیس کانسٹیبل کی نوکری دلانے کے نام پر 5 لاکھ روپے لیے گئے
جبکہ دوسرے شخص سے سرکاری نوکری دلانے کا وعدہ کرکے 7.5 لاکھ روپے وصول کیے گئے۔ دونوں کو بعد میں جعلی تقرری کے خطوط دیے گئے۔پولیس نے شریدھر گوڑ اور اس کی بیوی نندنی کو گرفتار کرکے عدالتی ریمانڈ پر بھیج دیا ہے۔ پولیس مزید تحقیقات کر رہی ہے۔
