کریم نگر سے حیدرآباد جانے والی الیکٹرک آر ٹی سی بس میں آگ، 37 مسافر محفوظ

کریم نگر: کریم نگر سے حیدرآباد جا رہی آر ٹی سی کی ایک الیکٹرک بس میں اتوار کو اچانک آگ بھڑک اٹھی، تاہم ڈرائیور کی بروقت حاضر دماغی سے 37 مسافروں کی جانیں محفوظ رہیں۔

 

کریم نگر-2 ڈپو کی یہ بس لوئر مانیر ڈیم (ایل ایم ڈی) کے قریب تیمماپور منڈل کے علاقے میں پہنچی تھی کہ اچانک تکنیکی خرابی کے باعث دھواں اٹھنے لگا اور آگ بھڑک اٹھی۔ ابتدائی طور پر شبہ ظاہر کیا جا رہا ہے کہ حادثہ بیٹری یا وائرنگ میں شارٹ سرکٹ کے باعث پیش آیا۔

 

ڈرائیور نے فوری طور پر بس کو سڑک کنارے روک کر کنڈکٹر کے ساتھ مل کر تمام 37 مسافروں کو بحفاظت نیچے اتار دیا۔ مسافروں کے اترنے کے چند ہی منٹ بعد آگ نے پوری بس کو اپنی لپیٹ میں لے لیا۔

 

اطلاع ملتے ہی فائر بریگیڈ کے اہلکار موقع پر پہنچ گئے، تاہم اس وقت تک بس مکمل طور پر جل کر خاکستر ہو چکی تھی۔ واقعے سے مسافروں اور مقامی افراد میں خوف و ہراس پھیل گیا۔

 

آر ٹی سی کے اعلیٰ حکام اور پولیس نے موقع پر پہنچ کر معائنہ کیا، جبکہ حادثے کی وجوہات جاننے کے لیے خصوصی تکنیکی ٹیم کے ذریعے تحقیقات شروع کر دی گئی ہیں۔