ایس بی آئی میں کلرک اور پروبیشنری آفیسرس کی 6 ہزار سے زائد ملازمتوں پر تقررات کے لئے نوٹیفکیشن جاری _ جانئے مزید تفصیلات
حیدرآباد _ 31 اگست ( اردولیکس)اسٹیٹ بینک آف انڈیا ( ایس بی آئی) جو ملک کا سب سے بڑا پبلک سیکٹر بینک ہے گریجویشن مکمل کرنے والے نوجوانوں کو کلرک اور پروبیشنری آفیسرس کی ملازمتیں فراہم کرنے کے لیے نوٹیفکیشن جاری کیا ہے۔ ملک بھر میں 6,160 ملازمتوں کو پر کرنے کے لیے آن لائن درخواستیں طلب کی گئی ہیں۔ اہل امیدوار یکم سے 21 ستمبر تک آن لائن درخواست دے سکتے ہیں۔
ملک بھر میں 6160 ملازمتیں خالی ہیں۔ ایس سی کے لیے 989، ایس ٹی کے لیے 514، او بی سی کے لیے 1389، اقتصادی طور پر پسماندہ طبقات (EWS) کے لیے 603، اور غیر محفوظ کوٹے میں 2,665 ملازمتیں ہیں۔ ایس بی آئی نے اپنے نوٹیفکیشن میں کہا کہ تلنگانہ میں 125 اور آندھرا پردیش میں 390 ملازمتیں خالی ہیں۔
ان ملازمتوں کے لیے درخواست دینے والے امیدواروں کا کسی تسلیم شدہ یونیورسٹی یا تعلیمی ادارے سے ڈگری پاس ہونا ضروری ہے۔ درخواست دینے والے امیدواروں کے لیے اکتوبر یا نومبر کے مہینے میں تحریری امتحان آن لائن لیا جائے گا۔ امیدواروں کا انتخاب مقامی زبان کے ٹیسٹ، سرٹیفکیٹس کی تصدیق اور طبی معائنے کے ساتھ آن لائن ٹیسٹ کے بعد کیا جائے گا۔ منتخب امیدواروں کو ایک سال کے لیے تربیت دی جائے گی۔ تربیت کے دوران 15 ہزار روپے ماہانہ اسٹیفنڈ دیا جائے گا۔ کوئی اور الاؤنسز دستیاب نہیں رہیں گے ۔
یکم اگست 2023 کو امیدواروں کی عمر 20 سے 28 سال کے درمیان ہونی چاہیے۔ جنرل، او بی سی، ای ڈبلیو ایس زمرہ جات کے امیدواروں کو 300 روپے کی فیس ادا کرکے درخواست دینا ہوگی۔ ایس سی، ایس ٹی، معذور امیدواروں کو درخواست کی فیس سے مکمل استثنیٰ رکھا گیا ہے۔
