تلنگانہ میں 4 فیصد مسلم ریزرویشن کی برقراری کے لئے کانگریس کی جدوجہد جاری _ سینئر وکیل سلمان خورشید سے کانگریس قائدین کی ملاقات

حیدرآباد_ 23 ستمبر ( اردولیکس) تلنگانہ کانگریس کے سینئر قائدین نے جمعہ کو درج فہرست قبائل کے کوٹہ میں مجوزہ اضافہ اور 4 فیصد مسلم ریزرویشن پر سپریم کورٹ میں جاری کیس پر تفصیلی بات چیت کی۔

 

سپریم کورٹ کے سینئر وکیل سلمان خورشید کے دورہ حیدرآباد کے موقع پر جوبلی ہلز میں سابق وزیر محمد علی شبیر کی رہائش گاہ پر ان قائدین نے سلمان خورشید سے ملاقات کی۔ واضح رہے کہ 4 فیصد مسلم کوٹہ کیس میں سلمان خورشید سپریم کورٹ میں شبیر علی کی نمائندگی کر رہے ہیں۔

 

اس موقع پر ٹی پی سی سی کے صدر ریونت ریڈی، سابق مرکزی وزیر بلرام نائک، ٹی پی سی سی کے سینئر نائب صدر ظفر جاوید اور دیگر سینئر لیڈران بھی موجود تھے۔

 

میٹنگ کے بعد میڈیا سے بات کرتے ہوئے شبیر علی نے بتایا کہ کانگریس قائدین نے ممکنہ قانونی رکاوٹوں اور مضمرات پر تبادلہ خیال کیا اگر ریاستی حکومت ایک جی او جاری کرکے درج فہرست قبائل کے کوٹہ کو 6 فیصد سے بڑھا کر 10 فیصد کرتی ہے۔تو کانگریس اس کی تائید کرے گی۔ کانگریس قائدین کا خیال تھا کہ ایس ٹی کے کوٹہ میں بغیر کسی قانونی پیچیدگیوں کے اضافہ کیا جانا چاہئے اور اس بات کو یقینی بنانے کے لئے تمام حفاظتی اقدامات کئے جانے چاہئے کہ درج فہرست قبائل کو ملازمتوں اور تعلیم میں ان کے کوٹہ میں اضافہ کا فوری فائدہ حاصل ہو۔ شبیر علی نے خدشہ ظاہر کیا کہ چیف منسٹر کے چندر شیکھر راؤ شاید اپنے الفاظ کا احترام نہیں کریں گے اور کسی نہ کسی بہانے ایس ٹی کے کوٹہ میں اضافہ کرنے کا وعدہ کیا گیا جی او جاری نہیں کریں گے۔انہوں نے مزید کہا کہ سلمان خورشید سے 4 فیصد مسلم کوٹہ پر سپریم کورٹ میں جاری سماعت پر تفصیلی بحث ہوئی۔

 

سلمان خورشید نے کہا کہ سپریم کورٹ معاشی طور پر کمزور طبقات کے لیے ریزرویشن کے آئینی جواز اور آندھرا پردیش (بشمول تلنگانہ) میں مسلمانوں کو سماجی اور اقتصادی طور پر پسماندہ طبقہ کے لیے دیے گئے ریزرویشن کو چیلنج کرنے والے مقدمات کی سماعت کرے گی۔ انہوں نے کہا کہ ای ڈبلیو ایس کوٹہ سے متعلق دو سے تین اہم مسائل ہیں جو بحث کے دوران اٹھائے جا سکتے ہیں۔ انہوں نے کہا کہ سپریم کورٹ کہتی ہے کہ زیادہ سے زیادہ کوٹہ 50 فیصد سے زیادہ نہیں ہونا چاہیے کیونکہ یہ دوسروں کے ساتھ ناانصافی ہوگی۔

محفوظ زمرہ سے تعلق رکھنے والے قابل امیدوار 50 فیصد غیر محفوظ اوپن زمرہ کی نشستوں سے فائدہ اٹھانے کے اہل ہیں۔ لیکن 10فیصد EWS کوٹہ نے ان کے مواقع کو 50 فیصد سے گھٹا کر 40 فیصد کر دیا ہے۔ اس پر سماعت کے دوران بحث کی جائے گی انہوں نے کہا کہ تمام فریقین کی طرف سے بحث کے دوران ایسے بہت سے مسائل اٹھائے جائیں گے۔

4 فیصد مسلم کوٹہ کے بارے میں بات کرتے ہوئے، انہوں نے کہا کہ مسلمانوں کے بہت سے سماجی اور اقتصادی طور پر پسماندہ طبقے جو 27 فیصد OBC میں شامل نہیں تھے، کو ملازمتوں اور تعلیم میں علیحدہ 4 فیصد کوٹہ دیا گیا ہے۔ یہ مکمل تحقیق کے بعد اور بی سی کمیشن کی سفارشات کی بنیاد پر کیا گیا تھا۔ انہوں نے کہا کہ 4 فیصد مسلم کوٹہ کے بارے میں کسی کو شکایت نہیں ہونی چاہیے کیونکہ یہ کسی اور کمیونٹی سے نہیں چھینا گیا ہے۔ جب معاملہ سماعت کے لیے آئے گا تو ہم متعلقہ حقائق، اعداد و شمار اور رپورٹس کی بنیاد پر اپنی دلیل پیش کریں گے۔

جب سپریم کورٹ نے مارچ 2010 میں آندھرا پردیش (اور تلنگانہ) میں 4 فیصد مسلم کوٹہ پر روک لگا دی اور اس معاملے کو آئینی بنچ کے پاس بھیج دیا تو اس وقت کی کانگریس کی قیادت والی یو پی اے حکومت نے کوٹہ کا دفاع کیا۔ لیکن اب بی جے پی، جس نے 4 فیصد مسلم کوٹہ کی کھل کر مخالفت کی تھی، مرکز میں برسراقتدار ہے۔ یہ پوچھے جانے پر کہ کیا مرکز 2010 میں کوٹہ کے دفاع سے لے کر 2022 میں اس کی مخالفت تک اپنا موقف بدلے گا، سلمان خورشید نے اس امکان کو مسترد نہیں کیا۔ تاہم ان کا کہنا تھا کہ موقف بدل سکتا ہے لیکن قانون وہی رہے گا۔ "وہ (بی جے پی) باہر ایک بات اور اندر کی دوسری بات کرنے کے لیے جانے جاتے ہیں۔ بی جے پی کے لیڈران بشمول وزیر اعظم نریندر مودی نے ‘پسماندہ’ مسلم طبقوں کے لیے ریزرویشن کی وکالت کی تھی۔ اگر وہ واقعی تمام پسماندہ لوگوں کی مدد کرنا چاہتے ہیں تو انھیں ضرور حمایت کرنی چاہیے۔ اور جو پہلے سے دیا جا چکا ہے اس کی حفاظت کریں۔