نظام آباد میں میلادالنبی ﷺ کی عظیم الشان ریلی، مہیش کمار گوڑ اور محمد علی شبیر کی شرکت – گنگا جمنی تہذیب کے تحفظ پر زور

نظام آباد میں میلادالنبی ﷺ کی عظیم الشان ریلی، گنگا جمنی تہذیب کے تحفظ پر زور

نظام آباد، 26 اگست: نظام آباد شہر میں میلادالنبی ﷺ کی تقریبات جوش و خروش کے ساتھ منعقد کی گئیں۔ خِلّا روڈ سے نکالی گئی میلادالنبی ﷺ ریلی میں ہزاروں مسلمانوں، کانگریس قائدین، کارکنوں اور نوجوانوں نے شرکت کی۔ بعد ازاں خِلّا روڈ اور نہرو پارک میں منعقدہ جلسہ عام سے تلنگانہ حکومت کے مشیر محمد علی شبیر اور تلنگانہ پردیش کانگریس کمیٹی کے صدر مہیش کمار گوڑ نے خطاب کیا۔

 

اس موقع پر محمد علی شبیر اور مہیش کمار گوڑ نے مسلمانوں کو میلادالنبی ﷺ کی مبارکباد پیش کرتے ہوئے کہا کہ نبی کریم ﷺ نے محبت، امن، بھائی چارے، رحم و انسانیت کا پیغام دیا ہے، جس پر ہر شخص کو عمل کرنا چاہئے۔

 

محمد علی شبیر نے کہا کہ انسان کو انسان کا احترام کرنا، اس سے محبت کرنا اور مشکل وقت میں ایک دوسرے کا ساتھ دینا ہی حقیقی انسانیت ہے۔ انہوں نے عوام سے اپیل کی کہ ذات، مذہب اور علاقائی تفریق کی بنیاد پر معاشرے میں اختلافات پیدا نہ کئے جائیں۔

 

انہوں نے کہا کہ تلنگانہ ہمیشہ سے مختلف مذاہب اور طبقات کے لوگ مل جل کر رہنے کی شاندار روایت کا حامل رہا ہے۔ اس گنگا جمنی تہذیب اور سماجی ہم آہنگی کو آئندہ نسلوں تک پہنچانا ہر شہری کی ذمہ داری ہے۔ میلادالنبی ﷺ کے موقع پر انہوں نے معاشرے سے اپیل کی کہ نبی کریم ﷺ کے بتائے ہوئے امن، صبر، رحم اور بھائی چارے کے راستے پر چلتے ہوئے متحد ہوکر آگے بڑھیں۔

 

شبیر علی نے کہا کہ کانگریس پارٹی ہمیشہ سیکولر اصولوں کے لئے پابند عہد رہی ہے۔ ذات، مذہب، زبان یا علاقے کی تفریق کے بغیر ہر شہری کا یکساں احترام کرنا پارٹی کی پالیسی ہے۔ انہوں نے کہا کہ تلنگانہ حکومت ریاست کے ہر شہری کو پرامن اور باوقار زندگی فراہم کرنے کے لئے کام کر رہی ہے اور معاشرے کے تمام طبقات کی فلاح و بہبود حکومت کا بنیادی مقصد ہے۔

 

میلادالنبی ﷺ ریلی میں بڑی تعداد میں عوام نے شرکت کی۔ اس موقع پر اردو اکیڈمی کے چیئرمین طاہر بن حمدان، کسان کمیشن کے رکن گڈو گنگادھر، دیگر عوامی نمائندے، کارپوریٹرز، میلاد کمیٹی کے ذمہ داران، مذہبی شخصیات، کانگریس قائدین، یوتھ کانگریس کارکنان اور مختلف طبقات سے تعلق رکھنے والے افراد موجود تھے۔