عادل آباد میں ٹرانس جینڈرس کی مبینہ وصولی پر پولیس کارروائی، برادری نے نقلی افراد کے خلاف ایکشن کا مطالبہ کیا

عادل آباد میں ٹرانس جینڈرس کی مبینہ وصولی پر پولیس کارروائی، برادری نے نقلی افراد کے خلاف ایکشن کا مطالبہ کیا

عوامی شکایات پر پولیس کی کارروائی جاری، ایک فرد کی مبینہ حرکت پر پوری برادری کو موردِ الزام نہ ٹھہرایا جائے: علیزا

عادل آباد۔12/ستمبر (اردو لیکس)حالیہ دنوں عادل آباد شہر کے مختلف چوراہوں اور شاہراہوں پر ٹرانس جینڈرس کی جانب سے مبینہ طور پر عوام سے زبردستی رقم وصول کرنے اور غیر مہذب رویہ اختیار کیے جانے کی شکایات موصول ہونے کے بعد پولیس کی جانب سے قانونی کارروائی کا سلسلہ جاری ہے۔ پولیس نے عوام کو ہراساں کرنے اور زبردستی رقم وصول کرنے والوں کے خلاف سخت کارروائی کا انتباہ دیا ہے، جبکہ الزامات کی بنیاد پر بعض ٹرانس جینڈرس کو گرفتار کرکے ریمانڈ پر بھیجے جانے کی اطلاعات ہیں۔

 

اسی پس منظر میں ٹرانس جینڈر برادری کے ارکان نے ہفتہ کے روز عادل آباد پریس کلب میں پریس کانفرنس منعقد کی۔ اس موقع پر عادل آباد ٹرانس جینڈر سوسائٹی کی ضلع صدر علیزا نے برادری کے خلاف مبینہ طور پر چلائی جانے والی جھوٹی تشہیر پر تشویش کا اظہار کرتے ہوئے ٹرانس جینڈر کا روپ دھار کر عوام کو پریشان کرنے والے نقلی خواجہ سراؤں کے خلاف بھی سخت قانونی کارروائی کا مطالبہ کیا۔

 

علیزا نے کہا کہ ٹرانس جینڈر برادری گزشتہ 15 سال سے عادل آباد میں مقیم ہے۔ ان کے مطابق بعض افراد ٹرانس جینڈر برادری کے نام کا غلط استعمال کرتے ہوئے عوام کو ہراساں کر رہے ہیں اور نازیبا حرکات میں ملوث ہیں۔ انہوں نے پولیس سے مطالبہ کیا کہ ایسے افراد کی شناخت کرکے ان کے خلاف قانون کے مطابق کارروائی کی جائے۔

 

انہوں نے کہا کہ کسی ایک یا چند افراد کے مبینہ غلط اقدامات کی بنیاد پر پوری ٹرانس جینڈر برادری کو موردِ الزام ٹھہرانا درست نہیں ہے۔ جو بھی قانون کی خلاف ورزی کرتا ہے، اس کے خلاف بلا لحاظ برادری قانونی کارروائی ہونی چاہیے۔

 

علیزا نے مزید کہا کہ کئی ٹرانس جینڈر افراد اپنے خاندان اور رشتہ داروں سے علیحدہ ہوکر اپنی روزی روٹی کے لیے بھیک مانگنے پر مجبور ہیں۔ انہوں نے حکومت سے مطالبہ کیا کہ ٹرانس جینڈر افراد کے لیے فلاحی اسکیموں، روزگار اور معاشی خود کفالت کے لیے مؤثر اقدامات کیے جائیں، تاکہ وہ باعزت اور خودمختار زندگی گزار سکیں۔

 

ٹرانس جینڈر برادری نے عوام سے بھی اپیل کی کہ چند افراد کے مبینہ رویے کی بنیاد پر پوری برادری کے بارے میں عمومی رائے قائم نہ کی جائے، جبکہ قانون کی خلاف ورزی کرنے والے افراد کے خلاف پولیس کو شکایت کی جائے۔