فیفا ورلڈ کپ روانگی سے قبل ایرانی کھلاڑیوں نے قرآنِ مجید کا بوسہ لے کر سفر کا آغاز کیا
انطالیہ (ترکی): فیفا ورلڈ کپ 2026 میں شرکت کے لیے میکسیکو روانہ ہونے سے قبل ایرانی قومی فٹبال ٹیم کے کھلاڑیوں نے قرآنِ مجید کا بوسہ لے کر سفر کا آغاز کیا، جس کی تصاویر اور ویڈیوز سوشل میڈیا پر تیزی سے وائرل ہو رہی ہیں۔
ترکی کے شہر انطالیہ میں تربیتی کیمپ مکمل کرنے کے بعد ایرانی ٹیم ہفتہ کے روز میکسیکو کے شہر تیجوانا روانہ ہوئی، جہاں وہ ورلڈ کپ کے دوران اپنا تربیتی مرکز قائم کرے گی۔ روانگی کے وقت کئی کھلاڑیوں نے قرآنِ مجید کو عقیدت کے ساتھ بوسہ دیا اور دعا کرتے ہوئے سفر شروع کیا۔
میڈیا رپورٹس کے مطابق ایران کی ورلڈ کپ تیاریوں پر امریکا اور ایران کے درمیان جاری سیاسی کشیدگی کے اثرات بھی مرتب ہوئے ہیں۔ ویزا مسائل کے باعث ایران کو اپنا مجوزہ تربیتی مرکز امریکی ریاست ایریزونا سے منتقل کرکے میکسیکو کے تیجوانا شہر میں قائم کرنا پڑا۔
اگرچہ ایرانی کھلاڑیوں، کوچز اور بیشتر معاون عملے کو امریکا میں داخلے کے ویزے جاری کر دیے گئے ہیں، تاہم ایرانی فٹبال فیڈریشن کے بعض اعلیٰ عہدیدار اب بھی ویزوں کے منتظر ہیں، جس پر ایرانی حکام نے تشویش کا اظہار کیا ہے۔
ایران اپنی ورلڈ کپ مہم کا آغاز 15 جون کو نیوزی لینڈ کے خلاف کرے گا، جبکہ گروپ مرحلے میں اسے بیلجیم اور مصر کا بھی سامنا کرنا ہے۔
ایرانی ٹیم کی قرآنِ مجید کے ساتھ روانگی کی تصاویر کو دنیا بھر میں مسلمانوں کی جانب سے خوب سراہا جا رہا ہے اور سوشل میڈیا صارفین اسے ایمان، دعا اور قومی جذبے کی علامت قرار دے رہے ہیں۔
