لٹیری دلہن‘ شادی کے بعد عاشق کے ساتھ فرار، زیورات بھی لے گئی

 ریاست اترپردیش مین پوری کے کولی پور گاؤں میں 21 اپریل کو بیاہی گئی دلہن شادی کے صرف 15 دن بعد اپنے عاشق کے ساتھ فرار ہو گئی۔ شوہر جتیندر کا الزام ہے کہ اس کی بیوی اچلا گھر سے لاکھوں روپے کے زیورات لے کر اپنے عاشق ارون کے پاس نوئیڈا چلی گئی ہے۔ متاثرہ شخص نے ایس پی سے بیوی اور زیورات کی برآمدگی کی اپیل کی ہے۔

 

نئی دہلی:اتر پردیش کے مین پوری میں شادی کے چند ہی دن بعد ایک نو بیاہتا کے گھر چھوڑ کر چلے جانے کا معاملہ سامنے آیا ہے۔ شوہر نے بیوی پر الزام لگایا ہے کہ وہ اپنے عاشق کے ساتھ فرار ہو گئی اور گھر میں رکھے لاکھوں روپے کے زیورات بھی ساتھ لے گئی۔

 

متاثرہ نوجوان نے پولیس سپرنٹنڈنٹ سے شکایت کرکے کارروائی کا مطالبہ کیا ہے۔بتایا جا رہا ہے کہ پورا معاملہ مین پوری کے بھوگاؤں تھانہ علاقے کے گاؤں کولی پور کا ہے۔ یہاں رہنے والے جتیندر کمار نے پولیس سپرنٹنڈنٹ کو دی گئی شکایت میں بتایا کہ اس کی شادی 21 اپریل 2026 کو فرخ آباد کے کنورپور لوتھپور کی رہائشی اچلا کے ساتھ ہوئی تھی۔

 

شادی کے بعد سب کچھ معمول کے مطابق چل رہا تھا لیکن کچھ دنوں بعد اسے اپنی بیوی کے رویے پر شک ہونے لگا۔متاثرہ شخص کے مطابق اس کی بیوی کا پہلے سے ہی گاؤں کے رہنے والے ارون کمار نامی نوجوان کے ساتھ عشق چل رہا تھا اور دونوں کے درمیان مسلسل فون پر بات چیت ہوتی تھی۔

 

الزام ہے کہ 8 اور 9 مئی کی رات اچلا گھر سے غائب ہو گئی۔ جب گھر والوں نے تلاش کی تو معلوم ہوا کہ گھر میں رکھی سونے کی چین، چاندی کی پائل، کمر بند، کنڈی اور دیگر زیورات بھی غائب ہیں۔شکایت کنندہ کا کہنا ہے کہ دلہن کا عاشق ارون کمار نوئیڈا میں پرائیویٹ نوکری کرتا ہے اور اسی نے کسی نامعلوم مقام پر اس کی بیوی کو چھپا رکھا ہے۔

 

متاثرہ شوہر نے الزام لگایا کہ ارون کمار کے بھائی اور بہن بھی اس پورے معاملے میں اس کا ساتھ دے رہے ہیں۔ اس نے کچھ موبائل نمبر بھی پولیس کو دیے ہیں، جن کے بارے میں کہا گیا ہے کہ ان پر اس کی بیوی اور ملزم نوجوان کے درمیان بات چیت ہوتی تھی۔متاثرہ شوہر نے ایس پی سے اپیل کی ہے کہ اس کی

 

بیوی اور زیورات برآمد کیے جائیں اور ملزمان کے خلاف قانونی کارروائی کی جائے۔ ادھر پولیس نے معاملے کی تفتیش شروع کر دی ہے اور شکایت کی بنیاد پر حقائق کی جانچ کی جا رہی ہے۔