ٹرین ٹکٹ منسوخ کرنے کی ضرورت نہیں! نام بدل کر خاندان کے فرد کو سفر کرائیں، ریلوے نے دی بڑی سہولت

ریلوے ٹکٹ بک کرنے کے بعد اگر کسی وجہ سے سفر کرنا ممکن نہ ہو تو ٹکٹ منسوخ کرنے پر رقم کا نقصان ہوسکتا ہے۔ ایسے حالات میں بھارتی ریلوے کے قوانین کے تحت مسافروں کو کچھ سہولتیں دی گئی ہیں۔ آپ اپنے نام پر موجود کنفرم ریزرویشن کو مخصوص شرائط کے تحت خاندان کے کسی اہل فرد کے نام منتقل کرسکتے ہیں۔ اس کے علاوہ طلبہ، سرکاری ملازمین، شادی کی بارات اور این سی سی کیڈٹس کے لیے بھی ٹکٹ کی منتقلی کی سہولت موجود ہے۔

 

خاندان کے کسی فرد کے نام ٹکٹ منتقل کرنے کے لیے ٹرین کی روانگی سے کم از کم 24 گھنٹے پہلے ریلوے کو تحریری درخواست دینا ضروری ہے۔ اس کے لیے ریزرویشن کاؤنٹر پر اصل ریزرو ٹکٹ کے ساتھ جس شخص کے نام ٹکٹ منتقل کیا جارہا ہے، اس کے متعلقہ دستاویزات بھی پیش کرنا ہوں گے۔

 

ٹکٹ خاندان میں والد، والدہ، بھائی، بہن، بیٹا، بیٹی، شوہر یا بیوی کے نام منتقل کیا جاسکتا ہے۔

 

طلبہ کے لیے 48 گھنٹے پہلے درخواست

سرکاری یا نجی تعلیمی اداروں کے طلبہ اگر کسی وجہ سے سفر نہیں کرسکتے تو ان کا ٹکٹ اسی ادارے کے کسی دوسرے طالب علم کے نام منتقل کیا جاسکتا ہے۔ مثال کے طور پر کسی کالج کے طلبہ نے تعلیمی دورے کے لیے ٹکٹ بک کرائے اور دو طلبہ سفر نہیں کرسکے تو ان کے ٹکٹ اسی کالج کے دوسرے طلبہ کو منتقل کیے جاسکتے ہیں۔

 

اس کے لیے تعلیمی ادارے کی جانب سے تحریری درخواست دینا ضروری ہے اور کم از کم 48 گھنٹے پہلے ریزرویشن کاؤنٹر پر درخواست جمع کرانی ہوگی۔ ٹکٹوں کی منتقلی کی تعداد پورے گروپ کے 10 فیصد سے زیادہ نہیں ہونی چاہیے۔

 

شادی کی بارات کے لیے بھی سہولت

دور دراز علاقوں میں شادی کے لیے جانے والے افراد عموماً ٹرین سے سفر کرتے ہیں۔ اگر بارات میں شامل کوئی شخص سفر نہ کرسکے تو اس کا ٹکٹ اسی گروپ کے کسی دوسرے فرد کے نام منتقل کیا جاسکتا ہے۔

 

مثال کے طور پر حیدرآباد سے تروپتی جانے والی 30 افراد کی بارات میں تین افراد سفر نہیں کرسکے تو گروپ کے سربراہ کی جانب سے تحریری درخواست پر ان کے ٹکٹ دوسرے افراد کے نام منتقل کیے جاسکتے ہیں۔ اس کے لیے 48 گھنٹے پہلے درخواست دینا ہوگی اور زیادہ سے زیادہ 10 فیصد ٹکٹ ہی منتقل کیے جاسکتے ہیں۔

 

این سی سی کیڈٹس کو بھی سہولت

اگر این سی سی کیڈٹس کے گروپ میں کوئی ایک کیڈٹ سفر نہ کرسکے تو اس کا ریزرویشن اسی گروپ کے کسی دوسرے کیڈٹ کے نام منتقل کیا جاسکتا ہے۔ گروپ کی نگرانی کرنے والے افسر کو کم از کم 24 گھنٹے پہلے درخواست دینا ہوگی۔ یہاں بھی نام کی تبدیلی کی زیادہ سے زیادہ حد 10 فیصد ہے۔

 

سرکاری ملازمین کے لیے

اگر سرکاری ملازم کو سرکاری ڈیوٹی پر سفر کرنا ہو اور کسی دوسرے سرکاری ملازم کو اس کی جگہ سفر کرنا پڑے تو ٹکٹ پر نام تبدیل کیا جاسکتا ہے۔ اس کے لیے 24 گھنٹے پہلے درخواست دینا ضروری ہے۔

 

نام کی تبدیلی صرف ایک مرتبہ

کنفرم ٹکٹ پر درج مسافر ہی عام طور پر اس ٹکٹ پر سفر کرسکتا ہے۔ نام تبدیل کرنے کی سہولت صرف ایک مرتبہ دی جاتی ہے۔