سعودی عرب – جدہ میں 135 ملی میٹر ریکارڈ بارش، امدادی اداروں میں ہنگامی حالت

ریاض ۔ کے این واصف

محکمہ موسمیات نے کہا ہے کہ جدہ میں منگل کے روز ہونے والی بارش ملک میں سب سے زیادہ قرار دی گئی ہے۔سبق ویب سائٹ کے مطابق جدہ کے شمالی علاقوں میں پانچ گھنٹوں کے دوران وقفے وقفے سے بارش ہوتی رہی جبکہ الجوهرہ سٹیڈیم اور قرب وجوار کے علاقے میں 135 ملی میٹر بارش نوٹ کی گئی ہے۔

 

محکمہ موسمیات نے کہا ہے کہ کنگ عبد العزیز انٹر نیشنل ایئرپورٹ اسٹیشن نے 51 ملی میٹر بارش نوٹ کی ہے۔ جبکہ البساتين محلے کے اسٹیشن نے 81 ملی میٹر بارش نوٹ کی ہے۔ محکمہ موسمیات کی پیشگوئی کے مطابق جدہ میں بارش کا سلسلہ جمعرات تک جاری رہنے کا امکان ہے۔

 

ادارہ “ہلال احمر” نے کہا ہے کہ تمام ایمبولینس شعبوں میں ایمرجنسی پلان فعال کر دیا گیا ہے جبکہ جدہ میونسپلٹی نے بارش کی صورتحال سے نمٹنے کے لئے ہنگامی حالت کا اعلان کر دیا ہے۔ میونسپلٹی نے 11 بلدیاتی علاقوں اور 15 سپورٹ مراکز کے تحت ٹیموں کو تعینات کیا ہے

 

جنہیں 7,160 کارکنان اور 1,621 مشینری و آلات کی مدد حاصل ہے۔