“اموبا” ریاض کے نومنتخب صدرانعام اللہ بیگ نے دیگر اراکین کے ساتھ عہدے کا جائزہ حاصل کیا 

ریاض – کے این واصف

علیگڈھ مسلم یونیورسٹی اولڈ بوائز اسوسی ایشن (اموبا) ریاض کے نومنتخب صدر ڈاکٹر انعام اللہ بیگ نے ایک شاندار تقریب میں اپنے کابینی اراکین کے ساتھ عہدے کا جائزہ حاصل کیا۔ اس تقریب کی صدارت اموبا کے پہلے صدر و صاحب خیر ڈاکٹر ندیم ترین نے کی۔ نو منتخب اراکین میں محمد عبدالخلاق نائب صدر، ڈاکٹر سید احد مرتضیٰ علوی جنرل سکریٹری، محمد سراج الدین اور محمد اقبال عابد خازن جبکہ ارکان عاملہ مین مرزا ظہیر بیگ، محمد رضوان بیگ، احمد اسرار خاں اور فیض ارشد خاں شامل تھے۔تقریب کا آغاز حافظ و قاری عمار جاوید خاں کی قراءت کلام پاک سے ہوا۔ ریاض میں علیگز کمیونٹی کی معروف و متحرک شخصیت تقی الدین میر نے نظامت کی اور اپنے ابتدائی کلمات کے بعد سبکدوش ہونے والی کمیٹی کے اراکین کو اسٹیج پر مدعو کیا۔ صدر ابرار حسین نے اپنی دوسالہ کارکردگی کی رپورٹ پیش کی اور اپنی معیاد انھیں حاصل تعاون کا شکریہ ادا کیا۔ ان کے علاوہ جنرل سکریٹری مرغوب محسن اور شعبہ خواتین کی نمائندہ مسز افراء العارفین نے بھی مخاطب کیا۔ الیکشن کمشنر عبدالغفار نے بھی اپنی رپورٹ پیش کی۔ جس کے بعد نومنتخب کمیٹی نے جائزہ حاصل کیا۔ جنرل سکریٹری ڈاکٹر احد مرتضیٰ علوی نے خیر مقدم کیا۔

 

نومنتخب صدر انعام اللہ بیگ نے اپنے خطاب کہا کہ ان پہلی ترجیح علیگ برادری میں اتحاد قائم کرنا اور انھیں متحرک کرنا ہوگی۔ انھوں نے کہا کہ ترقی اور کامیابی اتحاد ہی میں مضمر ہے۔ بیگ نے بتایا کہ اموبا ریاض کے دو ہزار سے زائد ممبرز ہیں مگر تنظیم میں چند ہی سرگرم ہیں۔ انھوں نے یہ بھی کہا کہ AMU فارغ التحصیل دیگر ممالک سے تعلق رکھنے والے سابق طلباء بھی ریاض میں برسرے کار ہیں۔ اموبا ان کو بھی تنظیم سے جوڑنے کی کوشش کرے گا۔ بیگ نے کہا کہ وہ شخصیت سازی اور ثقافتی پروگرامز کے اضافہ پر بھی خصوصی توجہ دینگے۔ اور موجودہ خواتین ونگ کو مزید فعال کریں گے۔

 

اس موقع پر ریاض کی دیگر سماجی تنظیموں کے اراکین نے بھی مختصر خطاب کیا اور نومنتخب اموبا کے ساتھ اپنی یگانگی اور تعاون کا تیقن دیا۔ نومنتخب صدر کو تہنیت پیش کرتے ہوئے شال پوشی کی اور گلدستے پیش کئے۔ صدر محفل ڈاکٹر ندیم ترین نے نئی کمیٹی کے لئے نیک خواہشات کا اظہار کرتے ہوئے کہا وہ دیکھ رہے ہین کہ ہر دو سال بعد منتخب ہونے والی ٹیم اموبا کو ایک قدم آگے لے جارہی ہے۔ انھون مشورہ دیا کہ AMU کے کیمپس سلکشن میں ریاض کی کمپنیوں کو شامل کرنے کی کوشش کی جانی چاہئے۔

 

ریاض کے مضافات میں واقع ایک وسیع فنکشن ھال میں منعقد اس تقریب مین مرد و خواتین علیگز کی ایک بڑی تعداد کے علاوہ ریاض کی سماجی تنظیمون نے بھی شرکت کی۔ تقی الدین میر نے دلچسپ انداز مین نظامت کی۔ نائب صدر محمد عبدالخلاق کے ہدیہ تشکر پر تقریب کا اختتام عمل میں آیا۔