‘چور’ کہے جانے کے خوف نے جان لے لی – حیدرآباد یونیورسٹی طالب علم کی تالاب میں کود کر خودکشی

حیدرآباد سنٹرل یونیورسٹی میں مغربی بنگال سے تعلق رکھنے والے طالب علم میانک کندو نے خودکشی کرلی. میانک کندو یونیورسٹی میں ایم اے اکنامکس فرسٹ ایئر کا طالب علم تھا۔

اطلاعات کے مطابق اس نے یونیورسٹی کی حدود میں موجود تالاب میں چھلانگ لگا کر خودکشی کرلی۔ واقعہ کی اطلاع یونیورسٹی سکیورٹی عملہ نے مقامی پولیس کو دی، جس کے بعد پولیس موقع پر پہنچ گئی اور نعش کو پوسٹ مارٹم کے لیے عثمانیہ دواخانہ منتقل کردیا۔

بتایا جارہا ہے کہ میانک کندو پر ماضی میں یونیورسٹی سے دو لیپ ٹاپ چوری کرنے کے الزامات لگے تھے۔ آج ایک اور لیپ ٹاپ گم ہونے کے بعد خود کو دوبارہ چور قرار دیے جانے کے خدشہ سے وہ شدید ذہنی دباؤ کا شکار ہوگیا تھا۔ اسی غم میں اس نے مبینہ طور پر یہ انتہائی قدم اٹھایا۔ گچی باؤلی پولیس نے مقدمہ درج کرکے تحقیقات شروع کردی ہیں۔