ممبئی میں بارش کا قہر جاری ، ہلاکتیں 13 تک پہنچ گئیں، عمارت گرنے سے 6 افراد ہلاک
ممبئی: ممبئی میں موسلا دھار بارش کا قہر جاری ہے، جس کے باعث معمولِ زندگی بری طرح مفلوج ہو گئی ہے۔ مختلف بارش سے متعلق حادثات میں اب تک 13 افراد ہلاک ہو چکے ہیں۔
اتوار کی رات مانکھرد علاقے میں ایک تین منزلہ رہائشی چال منہدم ہونے سے 6 افراد کی موت ہوگئی جبکہ ایک شخص زخمی ہو گیا۔ ملبے تلے مزید افراد کے دبے ہونے کا خدشہ ہے اور بچاؤ کارروائیاں جاری ہیں۔
شدید بارش کے باعث شہر کے کئی علاقوں میں پانی جمع ہو گیا، درخت اکھڑ گئے، ٹریفک کا نظام درہم برہم ہو گیا اور چھترپتی شیواجی مہاراج بین الاقوامی ہوائی اڈے پر پروازیں بھی متاثر ہوئیں۔ محکمہ موسمیات (آئی ایم ڈی) نے ممبئی کے لیے ریڈ الرٹ جاری کرتے ہوئے انتہائی شدید بارش کی پیش گوئی کی ہے۔
بی ایم سی کے مطابق گزشتہ 24 گھنٹوں کے دوران شہر کے متعدد علاقوں میں 200 سے 300 ملی میٹر تک بارش ریکارڈ کی گئی۔ شہری انتظامیہ نے عوام سے غیر ضروری سفر سے گریز کرنے اور ہنگامی صورتحال میں بی ایم سی کی ہیلپ لائن 1916 سے رابطہ کرنے کی اپیل کی ہے۔
