بیوی کی نجی تصاویر وائرل کرنے کی دھمکی۔ بلیک میل کرنے والے شوہر کے خلاف حیدرآباد میں شکایت

حیدرآباد: بیوی کی نجی تصاویر اور ویڈیوز سوشل میڈیا پر وائرل کرنے کی دھمکی دے کر اسے ہراساں کرنے کا معاملہ فلم نگر پولیس اسٹیشن کے حدود میں سامنے آیا ہے۔

پولیس کے مطابق بسواوتارک نگر سے تعلق رکھنے والی ایک 24 سالہ خاتون، جو پیشے سے ٹیچر ہے، نے پولیس سے رجوع کرتے ہوئے شکایت کی کہ اس کا شوہر مسلسل اسے ہراساں کر رہا ہے اور اس کی نجی تصاویر اور ویڈیوز سوشل میڈیا پر پوسٹ کرکے وائرل کرنے کی دھمکیاں دے رہا ہے۔

خاتون نے مزید الزام عائد کیا کہ اس کا شوہر اس کے انسٹاگرام اکاؤنٹ پر نازیبا تبصرے کرکے بھی اسے پریشان کر رہا ہے۔متاثرہ خاتون کے مطابق 2022 میں بھی اس کے شوہر نے اس کی نجی تصاویر کا غلط استعمال کرتے ہوئے انہیں فیس بک پر پوسٹ کیا تھا۔ اب ایک بار پھر وہ اسی طرح کی دھمکیاں دے رہا ہے۔

خاتون کی شکایت پر پولیس نے مقدمہ درج کرلیا ہے۔ پولیس اس معاملے کی تحقیقات کر رہی ہے اور اس بات کا بھی جائزہ لیا جا رہا ہے کہ آیا متاثرہ خاتون کی ذاتی معلومات، تصاویر یا ویڈیوز سوشل میڈیا پر نشر کی گئی ہیں یا نہیں۔