ڈرائیور کو دورے پڑنے سے اسکول بس بے قابو، 35 بچے بال بال بچ گئے – تلنگانہ کے میدک ضلع میں حادثہ
میدک، 14 نومبر (اردو لیکس) تلنگانہ کے ضلع میدک کے نرساپور میں ڈرائیور کو اچانک دورے پڑنے سے اسکول بس بے قابو ہوکر فٹ پاتھ پر چڑھ گئی۔ بس میں سوار 35 کمسن طلبہ خوش قسمتی سے محفوظ رہے اور ایک بڑا حادثہ ٹل گیا۔
تفصیلات کے مطابق وٹسَل گروکل پرائیویٹ اسکول کی بس تعطیل کے بعد نرسری تا ساتویں جماعت کے طلبہ کو گھروں تک پہنچانے جارہی تھی کہ ڈرائیور پربھاکر کو اچانک دورے پڑگئے، جس کے باعث بس فٹ پاتھ پر چڑھ کر وہاں کھڑی متعدد موٹر سائیکلوں اور ایک آٹو سے ٹکرا گئی۔
حادثے میں کئی گاڑیوں کو نقصان پہنچا، جبکہ ایک موٹر سائیکل مکمل طور پر تباہ ہوگئی۔ قریب ہی موجود دو برقی ٹرانسفارمروں سے بس ٹکرانے کی صورت میں بڑا جانی نقصان ہوسکتا تھا۔ مقامی افراد نے فوری طور پر بچوں کو بس سے بحفاظت باہر نکالا، جبکہ ڈرائیور کو علاج کے لیے ہسپتال منتقل کردیا گیا۔
واقعے کے بعد اسکول انتظامیہ کی جانب سے ڈرائیوروں کے طبی معائنے اور بچوں کی حفاظت کے انتظامات پر سوالات اٹھ رہے ہیں۔ والدین نے مطالبہ کیا ہے کہ اسکول بس ڈرائیوروں کی صحت کی باقاعدہ جانچ کو یقینی بنایا جائے تاکہ مستقبل میں ایسے حادثات سے بچا جاسکے۔
