تلنگانہ کے اضلاع کاماریڈی اور نظام آباد میں 7 کمسن بچے پانی میں ڈوب کر ہلاک
حیدرآباد: تلنگانہ کے کاماریڈی اور نظام آباد اضلاع میں پیش آئے دو الگ الگ افسوسناک واقعات میں سات کمسن بچے پانی میں ڈوب کر ہلاک ہوگئے، جس کے باعث دونوں علاقوں میں غم کی لہر دوڑ گئی اور متاثرہ خاندانوں میں کہرام مچ گیا۔
کاماریڈی ضلع کے پٹلم منڈل کے بولاک پلی گاؤں میں منجیرا ندی میں نہانے اور تیراکی کے لیے گئی چار کمسن بچیاں پانی میں ڈوب کر ہلاک ہوگئیں۔ پولیس کے مطابق انیتا، پاونی، شری وانی اور بھانو نامی بچیاں ندی میں اترنے کے بعد ایک دلدلی گڑھے میں پھنس گئیں اور ڈوب گئیں۔ واقعہ دیکھ کر ایک خاتون نے انہیں بچانے کی کوشش کی، تاہم وہ خود شدید زخمی ہوگئیں۔ مقامی افراد نے خاتون کو بچا لیا جبکہ بعد میں چاروں بچیوں کی لاشیں ندی سے نکال لی گئیں۔
پولیس نے بتایا کہ جمعہ کے روز بانسواڑہ منڈل کے بودیمی گاؤں کے قریب ایلمّا تہوار کی تقریبات منعقد ہوئی تھیں۔ تقریب کے اختتام اور کھانے کے بعد یہ بچیاں منجیرا ندی میں تیراکی کے لیے گئی تھیں جہاں یہ المناک حادثہ پیش آیا۔ تمام متوفیہ بچیاں 10 سال سے کم عمر تھیں۔
دوسری جانب نظام آباد ضلع کے بھیمنگل منڈل کے لمبادری گٹہ گاؤں کی وڈیرا کالونی میں پانی کے ایک تالاب میں ڈوب کر تین کمسن بچوں کی جان چلی گئی۔ پولیس کے مطابق ہریش (11)، ورشنی (6) اور اروند (10) نہانے کے لیے تالاب کے قریب گئے تھے، جہاں وہ حادثاتی طور پر پانی میں گر کر ڈوب گئے۔
اطلاع ملنے پر پولیس دونوں مقامات پر پہنچ گئی اور مقامی افراد کی مدد سے نعشوں کو پانی سے باہر نکال کر پوسٹ مارٹم کے لیے روانہ کیا۔ دونوں واقعات کے سلسلے میں مقدمات درج کر لیے گئے ہیں اور تحقیقات جاری ہیں۔
ایک ہی دن میں دو اضلاع میں سات کمسن بچوں کی المناک موت نے عوام کو جھنجھوڑ کر رکھ دیا ہے۔ والدین اور رشتہ داروں کے آہ و بکا سے فضا سوگوار ہوگئی، جبکہ مقامی افراد نے آبی ذخائر اور ندیوں کے اطراف حفاظتی اقدامات سخت کرنے کا مطالبہ کیا ہے۔
