کھانا کھاتے وقت بچوں میں موبائل فون دیکھنے کی عادت، موٹاپے اور فیٹی لیور کا خطرہ

نئی دہلی: موبائل فون آج ہر انسان کی بنیادی ضرورت بن چکا ہے۔ لوگ مسلسل اپنے فون میں مصروف رہتے ہیں جس کے نتیجے میں ان کی صحت متاثر ہو رہی ہے۔ اب تو صورتحال یہ ہو گئی ہے کہ بچے بھی فون کے بغیر کھانا کھانے سے انکار کر دیتے ہیں جو ایک سنگین مسئلہ بن گیا ہے۔ بچوں کی تربیت کا انداز بھی بدل چکا ہے۔

 

ایک وقت تھا جب کھانے کا مطلب گھر والوں کے ساتھ بیٹھ کر بات چیت کرنا ہوتا تھا، لیکن اب موبائل فون، ٹی وی اور ٹیبلیٹس نے اس روایت کو مکمل طور پر تبدیل کر دیا ہے۔کئی گھروں میں بچے فون دیکھے بغیر کھانا نہیں کھاتے اور والدین نے بھی اسے بچوں کو کھانا کھلانے کا آسان طریقہ سمجھ لیا ہے۔ بچے اس عادت کے ذریعے

 

والدین کو مجبور کرتے ہیں اور والدین مان جاتے ہیں مگر وہ اس بات سے لاعلم ہوتے ہیں کہ یہ رویہ طویل عرصے میں بچوں کی صحت کے لیے نقصان دہ ثابت ہو سکتا ہے۔سب سے زیادہ تشویش کی بات یہ ہے کہ 10 سے 13 سال کی عمر کے بچوں میں بھی فیٹی لیور اور انسولین مزاحمت جیسے مسائل سامنے آ رہے ہیں۔ پہلے یہ بیماریاں زیادہ

 

تر بڑوں میں پائی جاتی تھیں لیکن اب بچوں میں بھی تیزی سے بڑھ رہی ہیں۔ جب بچے اسکرین دیکھتے ہوئے کھانا کھاتے ہیں تو ان کے ذہن میں یہ بات بیٹھ جاتی ہے کہ کھانا صرف اسی وقت مزے دار ہوتا ہے جب اس کے ساتھ کوئی تفریح بھی ہو۔ اس طرح وہ اپنی اصل بھوک کو پہچان نہیں پاتے اور اکثر ضرورت سے زیادہ کھا لیتے ہیں۔

 

اسکرین سے نکلنے والی نیلی روشنی نہ صرف آنکھوں کو متاثر کرتی ہے بلکہ بچوں کے ہارمونز پر بھی اثر ڈالتی ہے۔ یہ میلاٹونن کی مقدار کو کم کر دیتی ہے جو نیند کے لیے ضروری ہے، اور بھوک سے متعلق ہارمونز جیسے گھریلن اور لیپٹین کے توازن کو بھی بگاڑ دیتی ہے۔ اس کے نتیجے میں بھوک بڑھ جاتی ہے

 

میٹھا کھانے کی خواہش میں اضافہ ہوتا ہے اور پیٹ بھرنے کا احساس کم ہو جاتا ہے۔مزید یہ کہ اسکرین اسکرول کرنا اور جنک فوڈ کھانا دونوں دماغ میں ڈوپامائن کو بڑھاتے ہیں، جو خوشی کا احساس پیدا کرتا ہے۔ جب یہ دونوں چیزیں اکٹھی ہو جائیں تو بچے بار بار یہی عمل دہراتے ہیں، جس سے ایک طرح کی لت لگ سکتی ہے۔

 

یہی وجہ ہے کہ آج کل بچے جنک فوڈ کو زیادہ پسند کرنے لگے ہیں۔والدین اکثر بچوں کو جلدی کھانا کھلانے کے لیے ان کے ہاتھ میں موبائل دے دیتے ہیں، لیکن یہ عادت مستقبل میں ان کی صحت کے لیے نقصان دہ ثابت ہو سکتی ہے۔ اس لیے ضروری ہے کہ اس رویے کو ترک کیا جائے۔

 

کھانے کے وقت اسکرینز کو مکمل طور پر بند کریں، گھر والوں کے ساتھ مل بیٹھ کر کھانے کی عادت ڈالیں، بچوں کو آہستہ اور توجہ کے ساتھ کھانا کھانا سکھائیں، اور سب سے اہم بات یہ کہ جنک فوڈ کے استعمال کو محدود کریں۔