لارنس بشنوئی کے بھائی کے سر پر این آئی اے نے رکھا 10 لاکھ کا انعام

نئی دہلی ۔ نیشنل انویسٹی گیشن ایجنسی (این آئی اے) نے حالیہ دنوں میں لارنس بشنوئی گینگ کے خلاف اپنی کارروائیاں تیز کر دی ہیں۔ ایجنسی نے لارنس کے بھائی، انمول بشنوئی، کے بارے میں ایک اہم پیش رفت کی ہے اور اس پر 10 لاکھ روپے کے انعام کا اعلان کیا ہے۔ انمول بشنوئی، جسے عرف بھانو کے نام سے بھی جانا جاتا ہے

معروف گینگسٹر لارنس بشنوئی کا بھائی ہے اور اس کا نام گلوکار و سیاستدان سدھو موسی والا کے قتل کے سلسلے میں بھی لیا جا رہا ہے۔انمول بشنوئی کا نام کئی فوجداری معاملات میں ملوث ہے اور وہ 2023 میں ان کے خلاف دائر کی جانے والی چارج شیٹ کا اہم ملزم ہے۔ رپورٹس کے مطابق انمول بشنوئی نے فرضی پاسپورٹ کی مدد سے ہندوستان سے فرار ہو جانے میں کامیابی حاصل کی۔ وہ اپنے ٹھکانے کو مسلسل تبدیل کرتا رہتا ہے۔ گزشتہ سال اسے کینیا میں اور اس سال کینیڈا میں دیکھا گیا تھا

انمول بشنوئی کے خلاف جملہ 18 فوجداری مقدمات درج ہیں ، وہ جودھ پور جیل میں اپنی سزا بھی کاٹ چکا ہے اور 7 اکتوبر 2021 کو ضمانت پر رہا ہوا تھا۔