لوجہاد اور تبدیلی مذہب کی سرگرمیوں کے الزام میں 3 مسلم ٹیچرس معطل _ راجستھان کے وزیر تعلیم مدن دلاور کی کارروائی

جئے پور _ 24 فروری ( اردولیکس ڈیسک) راجستھان میں 3 مسلم ٹیچرس کو لوجہاد اور تبدیلی مذہب کی مبینہ ترغیب دینے کے الزام میں معطل کردیا گیا ہے راجستھان کے وزیر تعلیم مدن دلاور نے تبدیلی مذہب اور محبت جہاد سے متعلق سرگرمیوں میں مبینہ طور پر ملوث ہونے کے الزام میں دو اساتذہ کو معطل کر دیا ہے۔ ایک اور ٹیچر بھی زیر تفتیش ہے۔ کوٹہ کے سنگوڈ بلاک کے ایک اسکول میں کام کرنے والے دو اساتذہ کو معطل کر دیا گیا ہے۔ اس موقع پر وزیر دلاور نے ایک ویڈیو جاری کیا۔

انھوں نے کہا کہ ہمیں اطلاع ملی ہے کہ ایک سیکنڈری اسکول میں زیر تعلیم ایک ہندو لڑکی کا نام بدل کر مسلمان رکھا گیا ہے۔ وزیر تعلیم دلاور نے کہا کہ جیسا کہ ہمیں اطلاع ملی تھی کہ اس علاقے میں تبدیلی مذہب اور لو جہاد کی سازش کا شبہ ہے، اس میں ملوث دو اساتذہ کو معطل کر دیا گیا ہے۔ انہوں نے کہا کہ اگر یہ پایا جاتا ہے کہ انہوں نے یہ حرکتیں کی ہیں تو انہیں نوکری سے نکال دیا جائے گا۔

معطل ٹیچرس کی شناخت شبانہ ،  مرزا مجاہد اور فیروز خان کے نام سے ہوئی ہے۔ یہ معاملہ اس وقت سامنے آیا جب سرو ہندو سماج، سنگوڈ نے وزیر تعلیم کو ایک میمورنڈم بھیجا جس میں الزام لگایا گیا کہ اسکول میں سال 2019 سے لوجہاد اور تبدیلی مذہب کی سرگرمیاں جاری ہیں ۔ سرو ہندو سماج نے الزام لگایا کہ دونوں اساتذہ کے پاکستانی گروپوں سے تعلقات ہیں ۔