’’لاپتہ، بھگوڑے‘‘ یہ زبان درست نہیں: امیت شاہ
نئی دہلی: مانسون اجلاس کے دوران پارلیمنٹ میں جاری تعطل کے درمیان مرکزی وزیر داخلہ امیت شاہ نے اپوزیشن پر شدید حملہ کیا۔ انہوں نے کہا کہ حکومت ہر معاملے پر بحث کے لیے تیار ہے لیکن اپوزیشن پارلیمنٹ کی کارروائی چلنے نہیں دینا چاہتی۔
امیت شاہ نے کہا کہ طلبہ کے احتجاج سمیت ہر معاملے پر حکومت بحث کے لیے تیار ہے اور وہ اپوزیشن کے ہر سوال کا جواب دینے کے لیے تیار ہیں۔ انہوں نے کہا ’’حکومت کے پاس چھپانے کے لیے کچھ بھی نہیں ہے۔‘‘انہوں نے کہا’’سب سے پہلے، ’لاپتہ‘ اور ’بھگوڑے‘ جیسے الفاظ آج کل ہندوستان کی عوامی اور پارلیمانی زندگی میں مسلسل سننے کو مل رہے ہیں۔
پارلیمنٹ کا اجلاس شروع ہونے کے بعد سے میں باقاعدگی سے پارلیمنٹ آ رہا ہوں اور اپنے کمرے میں بیٹھتا ہوں لیکن جب اپوزیشن دونوں ایوانوں میں پارلیمنٹ کی کارروائی ہی نہیں چلنے دے رہی ہے تو ایسے میں کوئی کیا کرسکتا ہے؟‘‘بحث کے معاملے پر انہوں نے کہا کہ پارلیمانی امور کے وزیر کرن رجیجو پہلے ہی واضح کر چکے ہیں کہ حکومت نیٹ تحریک اور طلبہ کے احتجاج کے معاملے پر تفصیلی بحث کے لیے پوری طرح تیار ہے۔
ہم نے کہا تھا کہ بحث کا وقت طے کر لیا جائے اور اپوزیشن بھی اس کے لیے تیار ہو جائے۔ یہ ان کا ابتدائی مطالبہ تھا اور ہم نے اسے قبول بھی کر لیا تھا۔امیت شاہ نے مزید کہا کہ وہ خود پارلیمنٹ میں ہر سوال کا جواب دینے کے لیے تیار ہیں لیکن اپوزیشن بحث ہونے ہی نہیں دینا چاہتی۔
اب عوام خود فیصلہ کریں کہ بحث سے کون بھاگ رہا ہے۔وزیر داخلہ نے اپوزیشن کو چیلنج دیتے ہوئے کہا کہ وہ آج دوپہر 2 بجے تک اپنے مطالبات کا خط لوک سبھا اسپیکر کو دے دے۔ حکومت آج دوپہر 3 بجے سے کل دوپہر 3 بجے تک، یعنی پورے 24 گھنٹے ہر پہلو پر بحث کے لیے تیار ہے۔انہوں نے کہا ’’میں ایوان میں بیٹھوں گا، سب کی باتیں سنوں گا اور ہر معاملے کا جواب دوں گا۔
حکومت کے پاس چھپانے کے لیے کچھ بھی نہیں ہے۔ میں یہ بھی بتاؤں گا کہ آخر اپوزیشن بحث کیوں نہیں ہونے دینا چاہتی۔ وزیر اعظم نریندر مودی کی قیادت والی این ڈی اے حکومت ہر موضوع پر بحث کے لیے تیار ہے، بس اپوزیشن پارلیمنٹ کی کارروائی چلنے دے۔‘‘امیت شاہ نے الزام لگایا کہ اپوزیشن کو یہ طے کرنا ہوگا کہ وہ پارلیمنٹ چلانا چاہتی ہے یا صرف ہنگامہ کرنا چاہتی ہے۔
وزیر داخلہ کے اس بیان کو پارلیمنٹ میں جاری تعطل ختم کرنے کی حکومت کی کوشش کے طور پر دیکھا جا رہا ہے۔ اپوزیشن مختلف معاملات پر بحث کے مطالبے کو لے کر مسلسل ہنگامہ کر رہی ہے جبکہ حکومت کا کہنا ہے کہ وہ ہر موضوع پر بحث کے لیے تیار ہے۔
