ہندوستان کی اس ریاست میں پیدا ہونے والے ہر بچے کو حکومت دے گی سونے کی انگوٹھی
نئی دہلی: تمل ناڈو کے وزیراعلیٰ اور ٹی وی کے سربراہ وجے نے کرور میں منعقدہ عوامی جلسے سے خطاب کرتے ہوئے اہم بیانات دیے۔ کرور میں ماضی میں پیش آنے والے ہولناک بھگدڑ حادثے کے بعد ان کا یہ پہلا دورہ تھا جس کی وجہ سے اس جلسے کو خاص اہمیت حاصل ہوئی۔
جلسے سے خطاب کرتے ہوئے وجے نے کہا کہ کرور بھگدڑ کا واقعہ ان کی زندگی کا سب سے بڑا المیہ ہے۔ انہوں نے الزام لگایا کہ اس حادثے کے پیچھے ایک بڑی سیاسی سازش چھپی ہوئی تھی۔وجے نے کہا "اس دن کرور پولیس نے ہمیں خبردار نہیں کیا۔ پولیس کو پہلے سے معلوم تھا کہ وہاں بھگدڑ کا امکان ہے اس کے باوجود ہمیں جان بوجھ کر جلسہ گاہ کی طرف لے جایا گیا۔”
اسی جلسے میں انہوں نے اپوزیشن جماعتوں کو بھی شدید تنقید کا نشانہ بنایا۔ انہوں نے طنز کرتے ہوئے کہا کہ اسمبلی میں انہیں دیکھ کر اپوزیشن جماعتوں کے اراکین اسمبلی پیچھے ہٹ جاتے ہیں۔انہوں نے کہا کہ ریاست میں بدعنوانی کے لیے کوئی جگہ نہیں ہوگی اور بدعنوانی میں ملوث کسی بھی شخص کو بخشا نہیں جائے گا۔ وجے نے اعتماد ظاہر کیا کہ جلد ہی عوام کو دکھایا جائے گا کہ ٹی وی کے کی حکومت کس طرح کام کرے گی اور حکومت کی اصل طاقت کیا ہوگی۔
انہوں نے واضح کیا کہ ان کی جماعت حلقوں کی از سر نو حد بندی کے عمل کی مکمل مخالفت کرتی ہے۔ وزیراعلیٰ وجے نے ایک بار پھر یقین دہانی کرائی کہ انتخابات کے دوران عوام سے کیے گئے تمام وعدے ضرور پورے کیے جائیں گے۔اسی دوران انہوں نے ایک منفرد اعلان کرتے ہوئے کہا کہ
ریاست میں آئندہ پیدا ہونے والے ہر بچے کو ان کی حکومت کی جانب سے سونے کی انگوٹھی دی جائے گی۔وزیراعلیٰ کے دورے کے پیش نظر کرور میں سخت حفاظتی انتظامات کیے گئے تھے۔
