سپریم کورٹ میں کل پیر کو 240 عرضیوں پر ہوگی سماعت _ سی اے اے سے متعلق 232 درخواستیں بھی شامل
نئی دہلی _ 30 اکتوبر ( اردولیکس) دیوالی کی تعطیلات کے بعد، سپریم کورٹ پیر 31 اکتوبر کو متنازعہ شہریت (ترمیمی) ایکٹ (سی اے اے) سمیت تقریباً 240 درخواستوں کی سماعت کرے گی۔ قابل ذکر ہے کہ ان میں سے زیادہ تر مفاد عامہ کی عرضیاں ہیں۔ ان 240 درخواستوں میں سے تقریباً 232 درخواستیں سی اے اے سے متعلق ہیں۔ اہم بات یہ ہے کہ چیف جسٹس یو یو للت، جسٹس ایس رویندر بھٹ اور بیلا ایم ترویدی پر مشتمل بنچ نے پیر کو ان 232 درخواستوں کو سماعت کے لئے لسٹ کیا ہے ۔ اس سے پہلے ہی چیف جسٹس یو یو للت بنچ نے کہا تھا کہ شہریت قانون کو چیلنج کرنے والی عرضیوں کو سماعت کے لیے تین ججوں کی بنچ کو بھیجا جائے گا۔ واضح رہے کہ چیف جسٹس یو یو للت اگلے ماہ کی 8 تاریخ کو ریٹائر ہو جائیں گے۔
انڈین یونین مسلم لیگ (آئی یو ایم ایل) نے سی اے اے کے معاملے پر اہم عرضی دائر کی ہے۔ درخواست میں الزام لگایا گیا ہے کہ سی اے اے مساوات کے حق کی خلاف ورزی کرتا ہے اور اس کا مقصد مذہب کی بنیاد پر ایک گروپ کو الگ کرنا اور دوسرے پناہ گزینوں کو شہریت دینا ہے۔ درخواست میں یہ بھی کہا گیا کہ یہ ایکٹ آئین کے بنیادی ڈھانچے کے خلاف ہے اور مسلمانوں کے ساتھ امتیازی سلوک کرتا ہے۔ سی اے اے کے آئینی جواز کو انڈین یونین آف مسلم لیگ، پیس پارٹی، آسام گنا پریشد، آل آسام اسٹوڈنٹس یونین، جمعیت علمائے ہند، جے رام رمیش، مہوا موئترا، دیو مکھرجی،صدر مجلس و رکن پارلیمنٹ حیدرآباد بیرسٹر اسد الدین اویسی، تحسین پونا والا، اور دوسروں نے چیلنج کیا ہے۔
کانگریس لیڈر جے رام رمیش نے کہا کہ سی اے اے بنیادی حقوق پر حملہ ہے۔ یہ دعویٰ کیا گیا کہ یہ ایکٹ مذہب اور جغرافیائی حالات کی بنیاد پر دو زمرے بناتا ہے۔ دریں اثنا، سپریم کورٹ نے 2020 میں CAA کے نفاذ کو روکنے سے انکار کردیا تھا ۔ تاہم سپریم کورٹ نے کہا کہ ایک خصوصی بنچ تشکیل دیا جائے گا کیونکہ بڑی تعداد میں درخواستیں دائر کی گئی ہیں۔ سپریم کورٹ نے کہا کہ تحقیقات مکمل ہونے تک روک نہیں دی جا سکتی۔
