حادثہ میں ایک پاؤں سے محروم کورٹلہ ڈپو کے ڈرائیور محمد مدار کو 50لاکھ روپے انشورنس کی رقم حوالے

تلنگانہ آر ٹی سی کے وائس چیئرمین و منیجنگ ڈائریکٹر وائی. ناگی ریڈی نے حیدرآباد کے بس بھون میں منعقدہ تقریب میں ایک پیر سے محروم کورٹلہ کے ڈرائیور ایم ڈی. مدار کے افراد خاندان کو 50 لاکھ روپے کا چیک حوالے کیا۔

 

کریم نگر ضلع کے کورٹلہ ڈپو میں ڈرائیور کے طور پر خدمات انجام دینے والے ایم ڈی. مدار (اسٹاف نمبر E323013) 9 اکتوبر 2025 کو بس کے ذریعے کورٹلہ سے حیدرآباد آرہے تھے۔ صبح تقریباً 4:15 بجے کُکنور پلی کے قریب پل پر کھڑے لاری سے ان کی بس ٹکرا گئی۔ اس حادثے میں مدار کی ٹانگ بری طرح متاثر ہوئی اور انہیں اپنا پاؤں مکمل طور پر کھونا پڑا، جس کے نتیجے میں وہ مستقل معذوری کا شکار ہوگئے۔

 

گھر کے واحد بڑے سہارے کے مستقل طور پر معذور ہونے سے خاندان شدید مالی اور ذہنی مشکلات میں مبتلا ہوگیا تھا۔ ایسے مشکل وقت میں یونین بینک آف انڈیا کا ’سپر سیلری سیونگ اکاؤنٹ‘ متاثرہ خاندان کے لیے بڑا سہارا ثابت ہوا۔

 

ٹی جی ایس آر ٹی سی کی ہدایات کے مطابق ملازمین نے یونین بینک کی شاخوں میں اکاؤنٹس کھول رکھے ہیں اور انہیں روپے کارڈ بھی فراہم کئے گئے ہیں۔ اسی اکاؤنٹ کے تحت دستیاب مفت حادثاتی بیمہ کے ذریعے متاثرہ ڈرائیور کے خاندان کو 50 لاکھ روپے کی مالی امداد حاصل ہوئی۔

 

پیر کو حیدرآباد کے بس بھون میں منعقدہ تقریب میں ٹی جی ایس آر ٹی سی کے وائس چیئرمین و منیجنگ ڈائریکٹر وائی. ناگی ریڈی نے یونین بینک آف انڈیا کے سی جی ایم ایم. رویندر بابو اور ڈپٹی جنرل منیجر این. ستیہ نارائن بابجی کے ساتھ مل کر 50 لاکھ روپے کا چیک مدار کے خاندان کے حوالے کیا۔