جعلی دستاویزات کے ذریعہ میونسپل کی کروڑہا روہیوں کی زمین پر قبضہ ۔ اکرم نامی شخص گرفتار ۔ ڈی ایس پی کی پریس کانفرنس
عادل آباد۔17/مئی(اردو لیکس)عادل آباد میں غیر قانونی سرگرمیوں کے خلاف پولیس کی جانب سے کارروائیوں کا سلسلہ جاری ہے، اور حال ہی میں پولیس نے جعلی دستاویزات کے ذریعے کروڑوں روپے مالیت کی عادل آباد میونسپلٹی اراضی پر قبضہ کرنے والے ایک ملزم کو گرفتار کیا۔
عادل آباد ضلع ایس پی اکھل مہاجن آئی پی ایس کے چارج سنبھالنے کے بعد سے غیر قانونی سرگرمیوں کے خلاف سخت اقدامات کیے جا رہے ہیں۔ اس سلسلے میں جمعہ کے روز ڈی ایس پی جیون ریڈی نے ون ٹاؤن پولیس اسٹیشن میں میڈیا کانفرنس کے دوران اس واقعہ کی تفصیلات کا انکشاف کیا۔
انہوں نے بتایا کہ ضلع مستقر کے بھکتا پور علاقے میں کروڑوں روپے مالیت کی عادل آباد میونسپلٹی اراضی پر محمد اکرم ولد اسماعیل نے جعلی سیل ڈیڈ کے ذریعے قبضہ کر لیا تھا اور اراضی کی موٹیشن بھی کروالی تھی۔ ملزم محمد اکرم نے اپنے رشتہ دار سید شہاب الدین کے ذریعے غیر قانونی دستاویزات تیار کرائیں اور دعویٰ کیا کہ وہ 35 سال سے اس اراضی پر مقیم ہے۔
جب میونسپل حکام کو اس دھوکہ دہی کا علم ہوا تو انہوں نے فوری طور پر شکایت درج کرائی، جس کے بعد پولیس نے محمد اکرم کو گرفتار کر لیا، جبکہ سید شہاب الدین ابھی تک مفرور ہے۔
ڈی ایس پی جیون ریڈی نے مزید کہا کہ بلدیہ کے عملے کے خلاف بھی تحقیقات کی جائیں گی، جنہوں نے اس غیر قانونی رجسٹریشن میں مدد کی تھی۔ اگر بلدیہ کے کسی افسر یا اہلکار کا ملوث ہونے کا پتہ چلا تو ان کے خلاف قانونی کارروائی کی جائے گی۔
انہوں نے اس بات پر زور دیا کہ سرکاری اراضی کی حفاظت حکومتی مشینری کی ذمہ داری ہے اور اس سلسلے میں ضلع پولیس بھرپور تعاون کرے گی۔ ڈی ایس پی نے خبردار کیا کہ اگر کسی نے سرکاری اراضی پر قبضہ کرنے کی کوشش کی تو اس کے خلاف سخت کارروائی کی جائے گی۔
اس موقع پر عادل آباد ون ٹاؤن سرکل انسپکٹر بی سنیل کمار اور ان کے عملہ کے علاوہ دیگر پولیس افسران بھی موجود تھے۔
