پولیس کمشنر نظام آباد نے چرس اور منشیات کے استعمال کرنے والوں اور روڈی شیٹرس کی کونسلنگ کی  – پی ڈی ایکٹ کا انتباہ 

پولیس کمشنر نظام آباد نے چرس اور منشیات کے استعمال کرنے والوں اور روڈی شیٹرس کی کونسلنگ کی – پی ڈی ایکٹ کا انتباہ

 

نظام آباد:16/ مئی (اردو لیکس)ریاستی وزیر اعلیٰ اے ریونت ریڈی کے احکامات پر ریاست تلنگانہ میں گانجہ، چرس اور منشیات کے خاتمہ کیلئے محکمہ پولیس کی جانب سے خصوصی اقدامات کے تناظرمیں نظام آباد پولیس کمشنریٹ کے حدود میں ضلع پولیس اور ایگل ٹیم کے زیر اہتمام آج پولیس پریڈ گراؤنڈ نظام آباد میں ایک خصوصی شعور بیداری پروگرام کا انعقاد عمل میں لایا گیا۔

 

اس پروگرام میں کمشنر پولیس پی سائی چیتنیا نے شرکت کی۔ اس پروگرام میں وہ لوگ جو ماضی میں چرس، منشیات کے استعمال اور غیر قانونی اسمگلنگ کے مقدمات میں ملزم تھے، روڈی شٹرس، اور مشتبہ افراد کو پولیس پریڈ گراؤنڈ میں طلب کیا گیا اور خصوصی کونسلنگ کروائی گئی۔ اس موقع پر خطاب کرتے ہوئے پولیس کمشنر نے واضح کیا کہ منشیات کے استعمال سے نوجوانوں کا مستقبل تباہ ہو جاتا ہے اور خاندانوں کو شدید مالی اور سماجی مشکلات کا سامنا کرنا پڑتا ہے۔انہوں نے کہا کہ چرس اور منشیات کا استعمال نہ صرف صحت کے لیے خطرناک ہے بلکہ قانون کی نظر میں بھی سنگین جرم ہے، ایسی سرگرمیوں میں ملوث افراد کیخلاف سخت کارروائی کی جائے گی۔ انہوں نے انتباہ دیا کہ جن لوگوں کے خلاف ماضی میں مقدمہ درج کیا گیا ہے

 

انہیں اپنا رویہ بدلنا چاہیے اور معاشرے میں ذمہ دار شہری کے طور پر رہنا چاہیے اور اگر وہ دوبارہ ایسی سرگرمیوں میں حصہ لیتے ہیں تو پی ڈی ایکٹ جیسے سخت قوانین کے تحت کارروائی کی جا سکتی ہے۔عہدیداروں نے بتایا کہ ضلع میں چرس اور منشیات کی فروخت، نقل و حمل اور استعمال پر مسلسل نگرانی جاری رہے گی اور تعلیمی اداروں، ہاسٹلوں اور عوامی مقامات پر خصوصی تنقیح کی جارہی ہے۔ نوجوانوں کو چاہیے کہ وہ بری عادتوں سے دور رہیں اور تعلیم، روزگار اور خاندان کے مستقبل پر توجہ دیں۔ عوام کو چاہیے کہ وہ سماجی ذمہ داری کے طور پر اپنے آس پاس میں کسی بھی مشکوک سرگرمیوں یا چرس یا منشیات کی فروخت کی اطلاع قریبی پولیس اسٹیشن کو دیں 100 ڈائیل کریں

 

۔بعد ازاں ایگل ٹیم اور پولیس اہلکاروں نے خصوصی چیکنگ کی اور مشتبہ افراد کے ڈرگ ٹیسٹ کئے۔ چونکہ ان ٹیسٹوں میں منشیات کے استعمال کے لیے کچھ لوگوں کا ٹیسٹ مثبت آیا، ان کے خلاف متعلقہ قوانین کے تحت مقدمات درج کر کے عدالت میں پیش کیا جائے۔

 

اس پروگرام میں ایڈیشنل ڈی سی پی (اے آر) رام چندر راؤ، نظام آباد اے سی پی پرکاش ٹریفک اے سی پی مستان علی، ایگل ٹیم ڈی ایس پی ایم سوم ناتھم، ہوم گارڈ اے سی پی دیپک چندر، اسپیشل برانچ انسپکٹر کے سریدھر ریڈی، نظام آباد ٹاؤن سی آئی سرینواس راج، ساؤتھ رورل سی آئی کمار، نارتھ رورل سی آئی بی سرینواس، ڈچپلی سی آئی کے ونود، درپلی سی آئی بکشا پتی، نظام آباد ڈویژن ایس ایچ اوز، ایس آئی آئیز و دیگر نے شرکت کی۔