حیدرآباد میں چڈی گینگ کی دہشت – اپارٹمنٹ میں گھس کر چوری ؛ خاتون پر حملہ کی کوشش

حیدراباد: حیدرآباد کے منی کونڈہ کے نیکنام پور علاقے میں چڈی گینگ کی سرگرمی سے خوف و ہراس پھیل گیا۔ پولیس کے مطابق اتوار کی صبح تقریباً 3:20 بجے فلوتیلا اپارٹمنٹ میں تقریباً 6 مشتبہ افراد داخل ہوئے۔

 

بتایا گیا ہے کہ ملزمین نے تالاب کی جانب لگی فینسنگ کاٹ کر اپارٹمنٹ میں داخل ہونے کے بعد سی بلاک کی سیڑھیوں کے راستے ایک فلیٹ میں گھس کر قیمتی اشیا چوری کیں۔ اسی دوران ایک خاتون نے مشتبہ افراد کو دیکھ کر ان سے پوچھ تاچھ کی تو انہوں نے مبینہ طور پر خاتون کے ساتھ بدسلوکی کی اور ہتھیاروں سے حملہ کرنے کی کوشش کی، جس سے اپارٹمنٹ کے مکینوں میں خوف پھیل گیا۔

 

اطلاع ملتے ہی نارسنگی پولیس موقع پر پہنچی اور تفصیلات حاصل کیں۔ پولیس اپارٹمنٹ کے سی سی ٹی وی کیمروں کی فوٹیج کا جائزہ لے رہی ہے اور مشتبہ افراد کی نقل و حرکت کا سراغ لگا کر انہیں گرفتار کرنے کی کوشش کر رہی ہے۔

 

مقامی لوگوں نے نیکنام پور اور الکاپور ٹاؤن شپ کے اطراف رات کے وقت پولیس گشت بڑھانے کا مطالبہ کیا ہے۔ حکام نے عوام سے اپیل کی ہے کہ کوئی مشتبہ شخص یا سرگرمی نظر آنے پر فوری طور پر پولیس کو اطلاع دیں۔