عاشق کے ساتھ مل کر شوہر کے گھر میں چوری – دو ماہ کی دلہن اور نوجوان گرفتار
بنگلورو – فلمی کہانی سے ملتے جلتے ایک سنسنی خیز واقعہ میں پولیس نے نوبیاہتا دلہن اور اس کے مبینہ عاشق کو شوہر کے گھر سے لاکھوں روپے مالیت کے سونے کے زیورات چرا کر فرار ہونے کے الزام میں گرفتار کرلیا۔
ملزمہ کی شناخت حسینہ نداف کے طور پر کی گئی ہے جبکہ اس کے مبینہ عاشق کی شناخت ہنمنت مراپور کے نام سے ہوئی ہے۔ دونوں کو کٹکول پولیس نے شکایت درج ہونے کے محض 48 گھنٹوں کے اندر گرفتار کرلیا۔
پولیس کے مطابق یہ واقعہ کرناٹک کے ضلع بیلاگاوی کے رام درگ تعلقہ کے ہوساکوٹے گاؤں میں پیش آیا۔ حسینہ، جو مدالاگی تعلقہ کی رہنے والی ہے، کی شادی دو ماہ قبل ہی ہوساکوٹے گاؤں کے رہائشی شریف سے ہوئی تھی۔
تحقیقات میں انکشاف ہوا کہ شادی سے پہلے ہی حسینہ کے ہنمنت مراپور سے تعلقات تھے۔ پولیس کا کہنا ہے کہ شادی کے بعد بھی دونوں کا رابطہ برقرار رہا اور بعد میں انہوں نے ایک ساتھ مستقل زندگی گزارنے کا منصوبہ بنایا۔
اپنی نئی زندگی کے لیے رقم کا انتظام کرنے کی غرض سے حسینہ نے مبینہ طور پر شوہر کے گھر سے قیمتی زیورات چرانے کی سازش رچی۔ چار روز قبل جب گھر میں کوئی موجود نہیں تھا تو اس نے تقریباً 154.6 گرام سونے کے زیورات، جن کی مالیت تقریباً 21 لاکھ روپے بتائی گئی ہے، کے علاوہ 45 گرام چاندی کے زیورات چرا لئے اور اپنے عاشق کے ساتھ فرار ہوگئی۔
زیورات غائب ہونے کے بعد دلشان نداف، جو حسینہ کے شوہر کے رشتہ دار ہیں، نے کٹکول پولیس اسٹیشن میں شکایت درج کرائی۔ تفتیش کے دوران پولیس کو حسینہ کے اچانک لاپتہ ہونے پر شبہ ہوا اور اس کی نقل و حرکت کا سراغ لگایا گیا۔
پولیس نے کیس درج ہونے کے 48 گھنٹوں کے اندر دونوں ملزمین کو گرفتار کرلیا۔ حکام کے مطابق ملزمان کے قبضے سے لاکھوں روپے مالیت کے چوری شدہ سونے اور چاندی کے زیورات بھی برآمد کرلئے گئے۔
پولیس نے دونوں ملزمین کو عدالت میں پیش کرکے عدالتی تحویل میں بھیج دیا۔ نوبیاہتا دلہن کی جانب سے اپنے ہی شوہر کے گھر میں چوری کی مبینہ منصوبہ بندی اور عاشق کے ساتھ فرار ہونے کے واقعہ نے پورے علاقے میں سنسنی پھیلا دی ہے۔
