عمان میں ہندوستانی جہاز پر امریکہ کا حملہ۔ مہلوکین میں آندھرا پردیش کا انجینئر بھی شامل

حیدرآباد: عمان کے ساحل کے قریب بھارتی عملے کے ساتھ سفر کرنے والے ایک بحری جہاز پر امریکی حملے میں تین بھارتی شہریوں کی ہلاکت کی خبر سامنے آئی ہے۔ ہلاک ہونے والوں میں آندھرا پردیش کے شہر وشاکھاپٹنم سے تعلق رکھنے والے 44 سالہ میرین انجینئر سریش بھی شامل ہیں۔

 

اس بات کی تصدیق ان کے اہلِ خانہ اور دہلی میں موجود آندھرا بھون کے حکام نے کی ہے۔سریش کے پسماندگان میں ان کی اہلیہ بھارگوی اور دو بیٹے شامل ہیں، جن کی عمریں 13 اور 10 سال ہیں۔ بھارگوی نے بتایا کہ 24 جون کو ان کی شادی کی پندرہویں سالگرہ تھی لیکن اس سے پہلے ہی ان کے شوہر ہمیشہ کے لیے انہیں چھوڑ کر چلے گئے۔

 

خاندانی ذرائع کے مطابق سریش گزشتہ پانچ ماہ سے ڈیوٹی پر تھے اور جلد ہی گھر واپس آنے والے تھے۔ اس سلسلے میں انہوں نے واپسی کی اجازت بھی حاصل کر لی تھی۔بھارگوی کے مطابق "جہاز کے جنریٹر میں خرابی پیدا ہو گئی تھی جس کی جانچ کے لیے سریش وہاں گئے تھے۔ اسی دوران حملہ ہوا اور انہیں بچ نکلنے کا کوئی موقع نہ ملا۔

 

حکام نے بتایا کہ وہ موقع پر ہی ہلاک ہو گئے۔”انہوں نے مزید بتایا کہ سریش دراصل صرف دس دن کی ڈیوٹی کے لیے ایک دوسرے چیف انجینئر کی معاونت کی غرض سے گئے تھے لیکن وہاں کے حالات کے باعث ان کی مدتِ ملازمت میں توسیع کر دی گئی۔

 

بھارگوی نے کہا کہ حملے سے تقریباً ایک ہفتہ قبل تک جہاز اسی علاقے میں موجود تھا۔ وہاں سیکیورٹی پابندیوں اور سگنل جامرز کی وجہ سے آڈیو اور ویڈیو کالز ممکن نہیں تھیں اس لیے صرف ٹیکسٹ پیغامات کے ذریعے ہی رابطہ ہو پاتا تھا۔