دو سروں والی بچی کی پیدائش – ڈاکٹروں کی خصوصی نگرانی میں نوزائیدہ
بھونیشور: اوڈیشہ کے ضلع کندھمال میں ایک نادر طبی معاملہ سامنے آیا ہے، جہاں ایک خاتون نے دو سروں والے بچے کو جنم دیا۔ 10 اکتوبر، ہفتہ کو آپریشن کے ذریعے پیدائش کے بعد نومولود کو فوری طور پر برہام پور کے ایم کے سی جی میڈیکل کالج و ہاسپٹل کے خصوصی نوزائیدہ نگہداشت یونٹ (ایس این سی یو) میں شریک کردیا گیا، جہاں ڈاکٹروں کی ٹیم اس کی صحت پر مسلسل نظر رکھے ہوئے ہے۔
طبی اصطلاح میں اس پیدائشی کیفیت کو ڈائی سیفالس پیراپاگس (Dicephalus Parapagus) کہا جاتا ہے، جس میں ایک ہی جسم کے ساتھ دو سر اور دو گردنیں ہوتی ہیں۔ بتایا جاتا ہے کہ بچے کی ماں ضلع کندھمال کے تمودی بندھ علاقے کی رہنے والی ہے، جبکہ اس کا شوہر یومیہ اجرت پر مزدوری کرتا ہے۔ بہتر اور خصوصی طبی سہولتوں کی فراہمی کے لیے خاتون کو متعلقہ ہاسپٹل منتقل کیا گیا تھا۔ بچہ حمل کے 32ویں ہفتے میں پیدا ہوا اور جوڑے کی یہ پہلی اولاد ہے۔
نومولود کے دو سر ہونے کے باوجود اس کے ہاتھوں اور پیروں کا ایک ایک جوڑا ہے۔ اس کے علاوہ جسم میں پیشاب اور تولیدی نظام کی نالی ایک ہے اور بیرونی جنسی اعضاء مردانہ ہیں۔ تاہم بچے کی مجموعی صحت، جسم کے اندرونی اعضا کی ساخت اور ممکنہ طبی پیچیدگیوں کے بارے میں تفصیلی معلومات تاحال سامنے نہیں آئی ہیں۔
ڈاکٹروں کے مطابق فی الحال نومولود کو خصوصی نگہداشت یونٹ میں طبی نگرانی میں رکھا گیا ہے۔ اس کی صحت کا تفصیلی جائزہ لینے کے بعد ہی آئندہ علاج اور ضروری خصوصی طبی نگہداشت کے بارے میں فیصلہ کیا جائے گا۔
طبی ماہرین کے مطابق ایک ساتھ جڑے ہوئے بچوں کی پیدائش انتہائی نادر ہے اور تقریباً تین لاکھ پیدائشوں میں ایسا ایک معاملہ سامنے آتا ہے۔ اس واقعے نے اوڈیشہ کے مشہور جڑواں بچوں جگا اور کالیا کی یادیں بھی تازہ کردی ہیں، جن کے علاج کے دوران ریاست اور ملک بھر میں کافی توجہ مرکوز ہوئی تھی۔ ان کا معاملہ بھی پیدائشی پیچیدگیوں کے علاج میں ڈاکٹروں کو درپیش دشواریوں کی نمایاں مثال بنا تھا۔
آئندہ چند دن نومولود کی صحت کے اعتبار سے انتہائی اہم ہوں گے۔ طبی ٹیم کی جانچ اور نتائج کی بنیاد پر علاج کا طریقہ طے کیا جائے گا۔ ایسے معاملات میں بچے کی صحت کا انحصار جسمانی ساخت میں پائی جانے والی غیر معمولی کیفیت، متاثرہ اعضا اور پیدائش کے بعد پیدا ہونے والی ممکنہ پیچیدگیوں پر ہوتا ہے۔
