محمد سراج کو ٹیم سے باہر رکھنے پر سیاسی ہنگامہ – عمران مسعود کا مذہبی امتیاز کا الزام، سنیل گواسکر بھی انتخاب پر حیران، بی جے پی کا جوابی وار

نئی دہلی، 21 نومبر (اردو لیکس ڈیسک): ہندوستانی کرکٹ ٹیم کے تجربہ کار فاسٹ بولر محمد سراج کو نیوزی لینڈ کے خلاف پہلے ٹسٹ میچ کی پلیئنگ الیون میں شامل نہ کئے جانے کا معاملہ اب کرکٹ کے میدان سے نکل کر سیاسی تنازعہ اختیار کرگیا ہے۔
کانگریس کے رکن پارلیمنٹ عمران مسعود نے سراج کو ٹیم میں جگہ نہ دیئے جانے پر مذہبی امتیاز کا سوال اٹھاتے ہوئے الزام عائد کیا کہ اچھی کارکردگی کے باوجود انہیں صرف ان کے نام کی وجہ سے نظرانداز کیا گیا ہے۔ ان کے بیان پر بی جے پی قائدین نے شدید ردعمل ظاہر کرتے ہوئے کانگریس پر کرکٹ میں بھی فرقہ وارانہ اور ووٹ بینک کی سیاست کرنے کا الزام عائد کیا ہے۔
عمران مسعود نے خبر رساں ادارہ اے این آئی سے بات کرتے ہوئے سوال اٹھایا کہ اگر محمد سراج اچھی کارکردگی کا مظاہرہ کررہے ہیں اور اس کے باوجود انہیں ٹیم میں شامل نہیں کیا جارہا ہے تو اس کی وجہ کیا ہے؟ انہوں نے کہا کہ سراج کا نام ہی ان کے انتخاب میں رکاوٹ بن گیا ہے اور اگر عمدہ مظاہروں کے باوجود کسی کھلاڑی کو موقع نہیں دیا جاتا تو اسے امتیازی سلوک قرار دیا جاسکتا ہے۔ انہوں نے اپنے بیان میں اس معاملے کو مذہبی امتیاز سے جوڑتے ہوئے اپنے موقف کا دفاع کیا۔
کیا ہے پورا معاملہ؟
ہندوستان اور نیوزی لینڈ کے درمیان پہلے ٹسٹ میچ کا آغاز 19 نومبر کو ویلنگٹن کے بیسن ریزرو میدان پر ہوا۔ ہندوستانی ٹیم نے اپنی پلیئنگ الیون میں جسپریت بمراہ، آکاش دیپ، پرسدھ کرشنا اور انشل کمبوج کو فاسٹ بولرس کے طور پر شامل کیا، جبکہ محمد سراج اور گرنور برار کو ٹیم میں جگہ نہیں دی گئی۔ تاہم سراج ٹسٹ اسکواڈ کا حصہ ہیں، انہیں مکمل دورے یا اسکواڈ سے باہر نہیں کیا گیا بلکہ صرف پہلے ٹسٹ کی ابتدائی گیارہ کھلاڑیوں میں شامل نہیں کیا گیا۔
سراج کو نظرانداز کئے جانے پر سابق ہندوستانی کرکٹرز نے بھی سوالات اٹھائے۔ سابق کوچ روی شاستری نے سوشل میڈیا پر سوال کیا کہ محمد سراج کہاں ہیں؟ انہوں نے سراج کے تجربے، جارحانہ انداز اور گیند سے میچ کا رخ بدلنے کی صلاحیت کا حوالہ دیتے ہوئے کہا کہ اگر تیز رفتار بولنگ، مہارت اور سوئنگ کو معیار بنایا گیا تھا تو سراج کو موقع کیوں نہیں دیا گیا۔
سابق کپتان سنیل گواسکر نے بھی سراج کو ٹیم میں شامل نہ کئے جانے پر حیرت ظاہر کرتے ہوئے کہا کہ سراج نے کبھی ہندوستانی ٹیم کو مایوس نہیں کیا اور وہ اچھی ردھم میں دکھائی دے رہے تھے۔ سابق اسپنر روی چندرن اشون نے بھی اس فیصلے پر تنقید کی۔
سراج کی کارکردگی کے اعداد و شمار
محمد سراج جاری عالمی ٹسٹ چمپئن شپ کے دور میں ہندوستان کی جانب سے سب سے زیادہ وکٹیں حاصل کرنے والے بولر رہے ہیں۔ انہوں نے 11 مقابلوں میں 43 وکٹیں حاصل کی ہیں، جبکہ ان کی اوسط 26.81 اور اسٹرائیک ریٹ 45.69 رہا ہے۔ انگلینڈ کے خلاف 2025 کی پانچ ٹسٹ میچوں کی سیریز میں بھی انہوں نے 23 وکٹیں حاصل کرتے ہوئے اپنی صلاحیتوں کا مظاہرہ کیا تھا۔ یہی وجہ ہے کہ ان کے انتخاب کو لے کر سابق کھلاڑیوں اور کرکٹ شائقین میں بحث جاری ہے۔
ٹیم انتظامیہ نے کیا وضاحت دی؟
ہندوستانی کپتان شبمن گل نے سراج اور گرنور برار کو باہر رکھنے کے فیصلے کو مشکل قرار دیتے ہوئے کہا کہ ٹیم انتظامیہ گزشتہ ایک ہفتے سے بولنگ کے مختلف امتزاج پر غور کررہی تھی اور تمام فاسٹ بولرس اچھی کارکردگی کا مظاہرہ کررہے تھے۔
ٹیم کے بیٹنگ کوچ ستانشو کوٹک نے بھی سراج کو باہر رکھنے کے فیصلے کا دفاع کیا۔ ان کا کہنا تھا کہ سراج کے ساتھ کوئی مسئلہ نہیں ہے اور انتظامیہ نے پانچ روزہ ٹسٹ مقابلے کی مجموعی حکمت عملی اور حالات کو سامنے رکھتے ہوئے بہترین ٹیم منتخب کی ہے۔ ان کے مطابق آکاش دیپ اور انشل کمبوج کی بیٹنگ صلاحیت بھی ٹیم کے انتخاب میں ایک اہم پہلو تھی۔
بی جے پی کا کانگریس پر جوابی حملہ
عمران مسعود کے بیان پر بی جے پی کے قومی ترجمان پردیپ بھنڈاری نے سخت ردعمل ظاہر کرتے ہوئے کانگریس پر ووٹ بینک کی سیاست کا الزام عائد کیا۔ انہوں نے کہا کہ کانگریس نے ہندوستانی کرکٹ ٹیم کو بھی اپنی سیاسی اور فرقہ وارانہ سیاست سے نہیں بخشا۔ انہوں نے نشاندہی کی کہ ٹیم کے انتخاب میں رویندر جڈیجہ کو بھی جگہ نہیں ملی تھی اور ہر کھلاڑی ہندوستان کی نمائندگی کرتا ہے، اس لئے کھلاڑیوں کو مذہبی شناخت کی بنیاد پر نہیں دیکھا جانا چاہئے۔
بی جے پی ترجمان نلین کوہلی نے بھی عمران مسعود کے بیان کو بے بنیاد اور فرقہ وارانہ قرار دیتے ہوئے کہا کہ کرکٹ میں انتخاب کسی کھلاڑی کے مذہب کی بنیاد پر نہیں بلکہ ٹیم کی ضرورت اور حکمت عملی کے مطابق ہوتا ہے۔ مدھیہ پردیش کے وزیر وشواس سارنگ نے بھی کانگریس رکن پارلیمنٹ کے بیان پر تنقید کی۔
مرکزی وزیر کرن رجیجو کا ردعمل
مرکزی وزیر برائے اقلیتی امور کرن رجیجو نے بھی مذہبی امتیاز کے الزام کو مسترد کرتے ہوئے کہا کہ ہندوستان میں کسی کے ساتھ مذہب یا ذات کی بنیاد پر امتیازی سلوک نہیں کیا جاتا اور کھیلوں میں مواقع قابلیت اور کارکردگی کی بنیاد پر دیئے جاتے ہیں۔ انہوں نے کرکٹ جیسے کھیل کو مذہبی بنیادوں پر تقسیم کرنے سے گریز کرنے کی ضرورت پر زور دیا
کپل دیو نے انتخابی نظام کا دفاع کیا
سابق ہندوستانی کپتان کپل دیو نے بھی اس تنازعہ پر ردعمل ظاہر کرتے ہوئے کہا کہ ٹیم کا انتخاب سلیکٹرس، کپتان اور انتظامیہ کی ذمہ داری ہے۔ انہوں نے کہا کہ ان معاملات میں فیصلہ کرنے کا اختیار متعلقہ ذمہ داروں کو ہے اور ہر کسی کو خوش نہیں کیا جاسکتا۔ ان کے مطابق ہندوستانی کرکٹ اچھی سمت میں آگے بڑھ رہی ہے اور انتخابی نظام پر بلاوجہ تنقید نہیں کی جانی چاہئے۔
اس طرح محمد سراج کو پہلے ٹسٹ کی پلیئنگ الیون میں شامل نہ کئے جانے کا معاملہ ایک طرف کرکٹ ماہرین کے درمیان انتخابی حکمت عملی پر بحث کا موضوع بنا ہوا ہے تو دوسری طرف عمران مسعود کے مذہبی امتیاز سے متعلق الزام اور بی جے پی کے جوابی حملے نے اسے سیاسی رنگ دے دیا ہے۔ تاہم اب تک ایسا کوئی ثبوت سامنے نہیں آیا ہے جس سے یہ ثابت ہو کہ سراج کو مذہب کی بنیاد پر ٹیم سے باہر رکھا گیا۔




