تلنگانہ کے میدک ضلع میں خانگی ٹراویلس بس جل کر راکھ ، بڑا حادثہ ٹل گیا
تلنگانہ کے ضلع میدک میں ایک خانگی ٹراویلس بس اچانک آگ کی لپیٹ میں آ کر مکمل طور پر جل کر خاکستر ہوگئی۔ یہ واقعہ موسائی پیٹ کے قریب قومی شاہراہ پر اُس وقت پیش آیا جب بس میدک سے حیدرآباد کی جانب رواں دواں تھی۔
عینی شاہدین کے مطابق بس میں اچانک دھواں اٹھنا شروع ہوا جس کے بعد دیکھتے ہی دیکھتے آگ نے پوری گاڑی کو اپنی لپیٹ میں لے لیا۔ ڈرائیور نے بروقت بس کو سڑک کے کنارے روک دیا، تاہم وہ موقع سے فرار ہونے میں کامیاب ہوگیا۔
خوش قسمتی سے حادثے کے وقت بس میں کوئی مسافر موجود نہیں تھا، جس کی وجہ سے ایک بڑا جانی نقصان ٹل گیا۔ اطلاع ملتے ہی فائر بریگیڈ کا عملہ فوری طور پر موقع پر پہنچ گیا اور کافی جدوجہد کے بعد آگ پر قابو پا لیا، تاہم تب تک بس مکمل طور پر جل چکی تھی۔
پولیس نے موقع پر پہنچ کر معاملے کی جانچ شروع کر دی ہے۔ ابتدائی شبہ ہے کہ آگ لگنے کی وجہ تکنیکی خرابی یا شارٹ سرکٹ ہو سکتی ہے، تاہم اصل وجہ کا پتہ تحقیقات مکمل ہونے کے بعد ہی چل سکے گا۔ حکام نے ڈرائیور کی تلاش بھی شروع کر دی ہے اور مزید تفصیلات جلد سامنے آنے کی امید ہے۔
