محکمہ تعلیم اب مکمل طور پر ڈیجیٹل! 12 جون سے مکمل نفاذ – چھٹیاں اور میڈیکل بل اب آن لائن ؛ پرائیویٹ اسکولوں کی نگرانی کے لئے خصوصی نظام
تلنگانہ کے محکمہ اسکولی تعلیم میں ایک نئی ڈیجیٹل انقلاب کی شروعات ہوگئی ہے۔ انتظامی امور میں تاخیر کو ختم کرنے اور شفافیت میں اضافہ کرنے کے مقصد سے اب تمام خدمات مکمل طور پر آن لائن فراہم کی جائیں گی۔
اس سلسلے میں کاغذی نظام (Paperless Governance) کے نفاذ کے لیے ڈائریکٹر آف اسکول ایجوکیشن Naveen Nicolas نے اہم احکامات جاری کیے ہیں۔ ڈائریکٹوریٹ دفتر میں ٹی جی آن لائن ٹیم کے ساتھ ایڈیشنل اور جوائنٹ ڈائریکٹرس کو تال میل کے ذریعے اس ڈیجیٹلائزیشن عمل کو ترجیحی بنیادوں پر مکمل کرنے کی ہدایت دی گئی ہے۔
ضرورت پڑنے پر ضلع اور منڈل سطح کے تعلیمی دفاتر (ڈی ای او، ایم ای او) میں تکنیکی معاونت کے لیے بی ٹیک اہلیت رکھنے والے تین این جی ٹیز کو تبادلہ کی بنیاد پر مقرر کرنے کی بھی اجازت دی گئی ہے۔
مینوئل این او سی کا خاتمہ
اساتذہ سے متعلق نو آبجیکشن سرٹیفکیٹ (NOC) ماڈیولس کو فوری طور پر کسٹمائز کرنے کی ہدایت دی گئی ہے۔
12 جون سے خصوصی حالات کے علاوہ ڈائریکٹر کی پیشگی اجازت کے بغیر کوئی بھی مینوئل این او سی جاری نہیں کیا جائے گا۔
اسی طرح اساتذہ کی طویل مدتی رخصت، میڈیکل لیو اور غیر معمولی رخصت کی درخواستیں بھی اب خصوصی ڈیجیٹل نظام کے تحت ہی منظور کی جائیں گی۔
افسران کے خلاف محکمانہ کارروائیوں اور اپیلوں کی وصولی کے لیے محکمۂ تعلیم ایک خصوصی اپیلیٹ اتھارٹی ماڈیول بھی متعارف کرانے جا رہا ہے۔
پرائیویٹ اسکولوں کی شکایات کی آن لائن نگرانی
پرائیویٹ اسکولوں کے خلاف موصول ہونے والی شکایات کی نگرانی کے لیے اب تک کوئی مرکزی ٹریکنگ نظام موجود نہیں تھا، جس کے باعث مسائل کے حل میں شدید تاخیر ہورہی تھی۔
اس صورتحال کو مدنظر رکھتے ہوئے محکمہ نے ایک خصوصی آن لائن ماڈیول تیار کیا ہے۔
آئندہ ماہ 12 تاریخ سے پرائیویٹ اسکولوں سے متعلق شکایات آن لائن وصول کی جائیں گی اور ان کی پیش رفت (Status) کو ٹریک کرتے ہوئے متاثرین کو وقتاً فوقتاً معلومات فراہم کی جائیں گی۔
میڈیکل ری ایمبرسمنٹ بھی آن لائن
تدریسی و غیر تدریسی عملہ کے ساتھ ساتھ ریٹائرڈ ملازمین کے میڈیکل ری ایمبرسمنٹ بلوں کا عمل بھی 17 مئی سے مکمل طور پر آئی ایس ایم ایس پورٹل کے ذریعے آن لائن کردیا گیا ہے۔
ماضی میں ایم ای او دفتر سے ڈی ای او دفتر اور وہاں سے میڈیکل بورڈ تک فائلیں دستی طور پر بھیجی جاتی تھیں، جس سے ملازمین کو شدید مشکلات پیش آتی تھیں۔
اب یہ تمام عمل مکمل طور پر آن لائن ہوگا۔
تعلیمی حلقوں نے امید ظاہر کی ہے کہ ان نئی اصلاحات سے محکمۂ تعلیم کی انتظامیہ میں رفتار، شفافیت اور جوابدہی میں نمایاں اضافہ ہوگا۔
