سعودی عرب میں ایرپورٹس پر حملے،ریاض جانے والی پرواز واپس لوٹ گئی، ایئر انڈیا اور انڈیگو کی پروازیں منسوخ

نئی دہلی: سعودی عرب کو حوثی باغیوں کی جانب سے نشانہ بنائے جانے کے واقعات کے پیشِ نظر انڈیگو اور ایئر انڈیا نے اہم فیصلہ کیا ہے۔ سعودی دارالحکومت ریاض کے بین الاقوامی ہوائی اڈے پر حملے کے بعد دونوں ایئرلائنز نے 10 اکتوبر تک ریاض کے لیے اپنی پروازیں منسوخ کرنے کا اعلان کیا ہے۔

سکیورٹی خدشات کے پیشِ نظر آج دہلی سے ریاض کے لیے روانہ ہونے والی ایئر انڈیا کی ایک پرواز کو دورانِ سفر ہی واپس دہلی کی جانب موڑ دیا گیا۔ ایئرلائنز نے بتایا ہے کہ جن مسافروں نے ٹکٹ بک کیے تھے انہیں مکمل رقم واپس کی جائے گی۔ایئر انڈیا ایکسپریس کے ترجمان نے بتایا ’’خطے میں بدلتی ہوئی صورتحال کے پیشِ نظر ہم نے 10 اکتوبر تک ریاض کے لیے پروازوں کی آمد و رفت منسوخ کردی ہے۔

اس فیصلے سے متاثرہ مسافروں کو بغیر کسی اضافی چارج کے اپنی پرواز کی تاریخ تبدیل کرنے کی سہولت دی گئی ہے۔ اگر کوئی مسافر اپنا ٹکٹ منسوخ کرتا ہے تو اسے مکمل رقم واپس کی جائے گی۔ ہم وہاں کی صورتحال پر مسلسل اور قریبی نظر رکھے ہوئے ہیں۔‘‘بھارت نے ریاض کے کنگ خالد انٹرنیشنل ایئرپورٹ کے علاوہ ابھا ایئرپورٹ پر یمن کے حوثی باغیوں کی جانب سے کیے گئے حملوں کی مذمت کی ہے۔

بھارت نے کہا کہ بنیادی ڈھانچے کو نشانہ بنانا مناسب نہیں ہے۔ ان واقعات میں جان گنوانے والے شہریوں کے اہلِ خانہ سے گہری تعزیت کا اظہار کرتے ہوئے بھارتی وزارتِ خارجہ نے ایک بیان جاری کیا۔بھارت نے موجودہ مشکل حالات میں سعودی عوام اور حکومت کے ساتھ کھڑے رہنے کا بھی یقین دلایا ہے۔