آسٹریلیا میں حیدرآباد کی سندھیاریڈی اسٹریتھ فیلڈ میونسپل کونسل کی میئر منتخب

سڈنی: آسٹریلیا کے شہر سڈنی میں واقع اسٹریتھ فیلڈ میونسپل کونسل کی میئر کی حیثیت سے تلنگانہ سے تعلق رکھنے والی کَری سندھیاریڈی (شینڈی ریڈی) منتخب ہوئی ہیں۔ کونسل کے سرکاری اعلان کے مطابق، وہ اس سے قبل ڈپٹی میئر کے عہدے پر فائز تھیں اور اب انہیں کونسل کی 73ویں میئر منتخب کیا گیا ہے۔ وہ ستمبر 2028 تک اس عہدے پر برقرار رہیں گی۔

 

میئر منتخب ہونے کے بعد سندھیاریڈی نے کہا کہ مقامی کمیونٹی کی خدمت کا موقع ملنا ان کے لیے اعزاز کے ساتھ ساتھ ایک بڑی ذمہ داری بھی ہے۔

 

حیدرآباد کے خیریت آباد سے تعلق رکھنے والی سندھیاریڈی نے مقامی اسٹینلے کالج سے انٹرمیڈیٹ تک تعلیم حاصل کی۔ اس کے بعد انہوں نے حیدرآباد یونیورسٹی سے قانون کی ڈگری حاصل کی اور 1991 میں آسٹریلیا منتقل ہوگئیں۔ بعد ازاں انہوں نے امیگریشن وکیل کی حیثیت سے خدمات انجام دیں۔

 

سندھیاریڈی نے اپنے شوہر کے ساتھ مل کر مقامی سطح پر مختلف فلاحی اور سماجی سرگرمیوں میں بھی حصہ لیا۔ اسی دوران وہ 2021 میں پہلی مرتبہ اسٹریتھ فیلڈ کونسل کی کونسلر منتخب ہوئیں۔ 2024 میں انہوں نے دوبارہ کامیابی حاصل کی، جبکہ 2023 میں انہیں ڈپٹی میئر کی ذمہ داری سونپی گئی تھی۔

 

رکن پارلیمنٹ کونڈا وشویشور ریڈی کی رشتہ دار سندھیاریڈی نے اب اسٹریتھ فیلڈ میئر کا عہدہ سنبھال کر ایک اہم مقام حاصل کیا ہے۔