حیدرآباد بونال میں شرکت اور ڈانس پر تنقید – فاریہ عبداللہ کی آنکھیں نم؛ کہا ’’نفرت کے جواب میں بھی محبت اور دعا دوں گی ‘‘

بونال میں شرکت پر ٹرولنگ سے فاریہ عبداللہ آبدیدہ، کہا: ’’محبت اور انسانیت پر یقین رکھتی ہوں‘‘

 

حیدرآباد میں بونال کی تقریبات میں شرکت پر سوشل میڈیا ٹرولنگ کا سامنا کرنے والی اداکارہ فاریہ عبداللہ جذباتی ہوگئیں اور ویڈیو میں آبدیدہ ہوتے ہوئے اپنے خاندان، مذہبی عقائد، محبت اور انسانیت کے بارے میں اپنے خیالات کا اظہار کیا۔

 

فاریہ نے ہفتہ کو انسٹاگرام پر جاری ویڈیو میں بتایا کہ ان کے والد اسلام پر یقین رکھتے ہوئے اس مذہب میں داخل ہوئے اور انہیں اسلام کی اچھی باتیں سکھائیں۔ انہوں نے اپنی والدہ کی بات یاد کرتے ہوئے کہا کہ ’’اللہ ہر جگہ موجود ہیں‘‘۔ فاریہ نے کہا کہ وہ درخت، پتھر اور تتلی سمیت ہر چیز میں زندگی دیکھتی ہیں اور انسانوں کے درمیان محبت اور اتحاد چاہتی ہیں۔

 

خود کو ’کافر‘ کہہ کر تنقید کرنے والوں کو جواب دیتے ہوئے فاریہ نے کہا کہ وہ نفرت کرنے والوں کے لیے بھی محبت رکھتی ہیں اور ان کی بھلائی کے لیے دعا کرتی ہیں۔ انہوں نے کہا کہ انہیں لفظ ’اللہ‘ کا مطلب معلوم ہے اور ان کے لیے یہ ایسی روشنی ہے جو ہر جگہ اور ہر وقت سب کو جوڑتی ہے۔

 

واضح رہے کہ فاریہ نے حال ہی میں حیدرآباد میں منعقدہ بونال تقریبات میں شرکت کی تھی، جہاں انہوں نے خواتین کے ساتھ بونم اٹھایا اور پوتھوراجو کے ساتھ رقص بھی کیا تھا۔ اس پر بعض افراد نے سوشل میڈیا پر انہیں تنقید کا نشانہ بنایا، جس کے بعد فاریہ نے ویڈیو کے ذریعے اپنے جذبات کا اظہار کیا۔ ان کی جذباتی ویڈیو اور بیان سوشل میڈیا پر موضوعِ بحث بن گئے ہیں۔ ان کی اداکاری والی فلم ’سگما‘ بھی جلد ریلیز ہونے والی ہے۔

 

فاریہ عبداللہ کون ہیں؟

فاریہ عبداللہ حیدرآباد سے تعلق رکھنے والی بھارتی اداکارہ ہیں جو بنیادی طور پر تلگو فلموں میں کام کرتی ہیں۔ انہیں 2021 میں ریلیز ہونے والی کامیاب فلم ’جاتی رتنالو‘ میں ’چِٹی‘ کے کردار سے خاص شہرت ملی۔

 

فلمی دنیا میں آنے سے پہلے فاریہ تھیٹر سے وابستہ تھیں اور رقص و دیگر فنونِ لطیفہ میں بھی دلچسپی رکھتی ہیں۔ انہوں نے حیدرآباد کے لائولا کالج سے تعلیم حاصل کی۔

 

ان کی معروف فلموں میں ’جاتی رتنالو‘، ’لائک شیئر اینڈ سبسکرائب‘، ’راوناسورا‘، ’آ اوکّٹی اڈکّو‘، ’مَتھو وڈلرا 2‘ اور ’کلکی 2898 اے ڈی‘ شامل ہیں۔

 

اداکاری کے علاوہ فاریہ عبداللہ کو رقص، گلوکاری اور گیت نگاری کا بھی شوق ہے۔ وہ حیدرآباد کی مختلف ثقافتی سرگرمیوں میں بھی حصہ لیتی رہی ہیں۔

 

فاریہ عبداللہ ایک نوجوان تلگو فلم اداکارہ اور فنکارہ ہیں، جنہیں فلم ’جاتی رتنالو‘ کے ’چِٹی‘ کردار نے ملک بھر میں مقبولیت دلائی۔