حیدرآباد کے مشیرآباد میں بوگس فارم-7 کا معاملہ – 31 ووٹ حذف کرانے کی مبینہ کوشش، بی ایل اے کے خلاف پولیس میں شکایت
حیدرآباد – حیدرآباد کے مشیرآباد اسمبلی حلقہ میں بوگس فارم-7 دستاویزات کا معاملہ سامنے آنے کے بعد سیاسی حلقوں میں ہلچل مچ گئی ہے۔ 210ویں پولنگ مرکز کے حدود میں 31 ووٹروں کے ووٹ حذف کرانے کے لیے مبینہ طور پر جعلی دستاویزات جمع کرائے جانے کا الزام ہے
۔اس معاملے پر الیکٹورل رجسٹریشن آفیسر (ERO) نے بی جے پی سے وابستہ بوتھ لیول ایجنٹ (BLA) بال چندر کے خلاف مقامی پولیس اسٹیشن میں شکایت درج کرائی ہے۔ پولیس فارم-7 سے متعلق مبینہ جعلی دستاویزات کے معاملے کی تحقیقات کرے گی۔
۔ ریاستی چیف الیکٹورل آفیسر پہلے ہی ضلعی حکام کو ووٹر تفصیلات میں کسی بھی قسم کی بے قاعدگی کو روکنے کے لیے چوکس رہنے کی ہدایت دے چکے ہیں۔
دوسری جانب کانگریس نے سنگین الزام عائد کیا ہے کہ بوگس فارم-7 دستاویزات بی ایل اے کو بی جے پی کی جانب سے فراہم کیے گئے تھے۔ کانگریس قائدین نے پولیس کمشنر سے اس معاملے کی مکمل تحقیقات کے لیے خصوصی تحقیقاتی ٹیم تشکیل دینے کا مطالبہ کیا ہے
۔تحقیقات کے دوران یہ واضح ہونے کی توقع ہے کہ 31 ووٹ حذف کرانے کے لیے جمع کرائے گئے مبینہ جعلی دستاویزات کے پیچھے کون تھا، انہیں کس نے تیار کیا اور کس مقصد کے تحت جمع کرایا گیا۔
