باپ کی آخری رسومات کے اخراجات پر جھگڑا ۔ حیدرآباد میں بھائی نے بھائی کا قتل کردیا

حیدرآباد: باپ کی آخری رسومات کے اخراجات پر دو بھائیوں کے درمیان شروع ہونے والا تنازعہ ایک المناک انجام پر ختم ہوا۔

 

پیسے کے معاملے پر ہونے والے جھگڑے کے دوران چھوٹے بھائی نے قینچی سے بڑے بھائی پر حملہ کر دیا جس سے اس کی جان چلی گئی۔ یہ واقعہ سرور نگر پولیس اسٹیشن کے حدود میں واقع چمپا پیٹ کی کمہاربستی میں پیش آیا۔

 

مقامی لوگوں کی فراہم کردہ تفصیلات کے مطابق کمہار بستی کے رہائشی وینکٹیش (28 سال) اور اس کے چھوٹے بھائی شوا (26 سال) کے درمیان باپ کی آخری رسومات کے اخراجات کے سلسلے میں کچھ عرصے سے تنازعہ چل رہا تھا۔

 

بتایا جاتا ہے کہ شوا اپنے بڑے بھائی وینکٹیش سے اکثر اس بات پر جھگڑا کرتا تھا کہ اس نے آخری رسومات کے اخراجات میں اپنا حصہ نہیں دیا۔اسی سلسلے میں ہفتے کے روز دونوں کے درمیان ایک بار پھر شدید تکرار ہوئی۔ بات بڑھنے پر طیش میں آ کر شوا نے وینکٹیش پر قینچی سے حملہ کر دیا۔

 

شدید زخمی ہونے کے باعث وینکٹیش نے موقع پر ہی دم توڑ دیا۔ پولیس کا کہنا ہے کہ واقعے کے بعد ملزم موقع سے فرار ہو گیا۔اطلاع ملتے ہی سرور نگر پولیس نے موقعِ واردات پر پہنچ کر تفصیلات حاصل کیں۔ نعش کو پوسٹ مارٹم کے لیے ہاسپٹل منتقل کر دیا گیا ہے۔

 

پولیس نے معاملہ درج کر کے ملزم کی تلاش شروع کر دی ہے اور قتل کی وجوہات و حالات کی تحقیقات کر رہی ہے۔