تلنگانہ کے نظام آباد شہر میں یوٹیوبر ویشنوِی کے شوہر کا دن دہاڑے قتل، تین حملہ آور فرار
تلنگانہ کے نظام آباد شہر میں ایک سنسنی خیز قتل کی واردات پیش آئی۔ شہر کے اہم راجاراجیندر چوراہے کے قریب کورٹلہ شہر سے تعلق رکھنے والے ہری بابو پر تین نامعلوم حملہ آوروں نے انتہائی بے رحمی سے حملہ کرکے قتل کردیا۔ ہری بابو گزشتہ مارچ میں شدید بحث کا باعث بننے والے یوٹیوبر ویشنوِی قتل کیس کا اہم ملزم تھا۔ اسی پس منظر میں اس کے قتل سے علاقے میں سنسنی پھیل گئی۔
محبت کی شادی، صرف آٹھ ماہ بعد بیوی کا قتل
جگتیال ضلع کے ماداپور گاؤں سے تعلق رکھنے والی یوٹیوبر ویشنوِی سے ہری بابو نے محبت کی شادی کی تھی۔ دونوں نے گھر والوں کی مخالفت کے باوجود ماداپور میں سسرال میں رہنا شروع کیا تھا۔ تاہم شادی کے صرف آٹھ ماہ بعد دونوں کے درمیان اختلافات پیدا ہوگئے، جس کے بعد ہری بابو نے اپنی بیوی ویشنوِی کو مبینہ طور پر قتل کردیا۔ اس معاملے میں گرفتار ہوکر جیل جانے والا ہری بابو حال ہی میں ضمانت پر رہا ہوا تھا۔
بتایا جاتا ہے کہ ہری بابو راجاراجیندر چوراہے سے گزر رہا تھا کہ تین حملہ آوروں نے اسے روک لیا۔ حملہ آور اپنے ساتھ ناریل کاٹنے والی چھریاں لائے تھے۔ انہوں نے سڑک کے بیچ ہری بابو پر اندھا دھند وار کئے اور اسے چھریوں سے زخمی کردیا۔ شدید خون بہنے کے باعث ہری بابو نے موقع پر ہی دم توڑ دیا۔
اطلاع ملتے ہی پولیس موقع پر پہنچ گئی اور لاش کو پنچنامہ کے لئے نظام آباد سرکاری جنرل اسپتال (جی جی ایچ) کے مردہ خانے منتقل کردیا۔
پولیس اس زاویے سے بھی تحقیقات کررہی ہے کہ آیا ضمانت پر رہا ہونے والے ہری بابو کو ویشنوِی کے قتل کا بدلہ لینے کے لئے نشانہ بنایا گیا یا پھر اس قتل کے پیچھے کوئی پرانی دشمنی کارفرما ہے۔ قتل کے بعد فرار ہونے والے تینوں ملزمین کی تلاش کے لئے خصوصی پولیس ٹیمیں تشکیل دے کر تلاشی مہم شروع کردی گئی ہے۔
پولیس حکام کا کہنا ہے کہ جائے واردات اور اطراف میں نصب سی سی ٹی وی کیمروں کی فوٹیج کی مدد سے ملزمان کی شناخت کرکے انہیں جلد گرفتار کرنے کی کوشش کی جارہی ہے۔ پولیس قتل کے اصل اسباب کا بھی پتہ لگا رہی ہے۔
