"میں ڈائرکٹر بننا چاہتا تھا” سلمان خان کا انکشاف
ممبئی ۔ بالی ووڈ کے بھائی جان سلمان خان نے ایک انکشاف کیا ہے کہ وہ کبھی بھی اداکار نہیں بننا چاہتے تھے بلکہ ان کی خواہش ایک ڈائرکٹر بننے کی تھی۔ اپنے بھتیجہ ارہان خان کی پوڈکاسٹ "دم بریانی” میں بات کرتے ہوئے سلمان خان نے کہا کہ جب وہ 17 سال کے تھے تو ان کا خواب تھا کہ وہ ایک ڈائریکٹر بنیں۔
سلمان نے مزید بتایا کہ اس دوران کسی نے بھی انہیں ڈائریکشن کے لئے کام نہیں دیا اور انہیں صرف "بچہ” کہہ کر نظر انداز کیا گیا۔ ساتھ ہی ان کو اداکار بننے کا مشورہ دیا گیا۔ اس گفتگو میں سلمان خان نے ارہان کو زندگی میں صحیح کیریئر کے انتخاب اور درست راستے پر چلنے کی نصیحت بھی کی۔
سلمان خان نے کہا "میں ابتدائی طور پر ڈائرکٹر بننے کے بارے میں بہت پُرعزم تھا اور اس وقت ماڈلنگ کر رہا تھا۔ میں ہدایت کاری کی طرف آنا چاہتا تھا۔ میں اُس وقت بھی لکھتا تھا اور اب بھی لکھتا ہوں۔”انہوں نے مزید کہا "میں تو ڈائرکٹر بننا چاہتا تھا لیکن کسی نے مجھے کام نہیں دیا۔ جب میری عمر 17 سال تھی تو لوگ کہتے تھے کہ یہ بچہ کیا ڈائریکٹ کرے گا۔”
اس دوران سلمان خان نے اپنے مداحوں کو یہ بھی بتایا کہ ان کی اگلی فلم "سکندر” ریلیز کے لیے تیار ہے جس میں رشمیکا، سنیل شیٹی، شرمن جوشی، اور کاجل اگروال جیسے معروف اداکار شامل ہیں۔
