محبوب نگر پریس کلب میں یومِ آزادی کی تقریب – صدر نریندر چاری کے ہاتھوں قومی پرچم کشائی، صحافتی برادری کی شرکت

محبوب نگر پریس کلب میں یومِ آزادی کی پُروقار تقریب صدر نریندر چاری کے ہاتھوں قومی پرچم کشائی، صحافتی برادری کی بھرپور شرکت

 

ضلع محبوب نگر کے پریس کلب میں 15 اگست یومِ آزادی کے پُرمسرت موقع پر ایک باوقار اور شاندار تقریب کا انعقاد عمل میں آیا۔ اس تقریب میں ضلع کے تمام سینئر و نوجوان صحافتی نمائندوں اور پریس کلب کے عہدیداران نے بڑی تعداد میں شرکت کی اور روایتی وقار و حب الوطنی کے جذبے کے ساتھ ملک کا یومِ آزادی منایا۔

 

پریس کلب کے احاطے میں پریس کلب کے صدر جناب نریندر چاری کے دستِ مبارک سے باضابطہ طور پر قومی پرچم لہرایا گیا۔ پرچم کشائی کے فوراً بعد تمام موجود صحافیوں اور عہدیداران نے مل کر قومی ترانہ پڑھتے ہوئے قومی پرچم کو سلامی پیش کی اور بھارت ماتا کی جے کے نعرے لگائے۔

 

اس پروقار تقریب میں پریس کلب کے صدر نریندر چاری کے ہمراہ سیکریٹری نریندر گوڑ، جنرل سیکریٹری کرشنا، جوائنٹ سیکریٹری چنتکائل وینکٹیش، سینئر ڈسٹرکٹ اسٹاف رپورٹر احد صدیقی، سینئر جرنلسٹ و 99 اسٹاف رپورٹر ایم بی پربھاکر، سینئر جرنلسٹ شہاب الدین، ٹی وی 5 رپورٹر روی، اے بی این رپورٹر بسوراج اور ڈسٹرکٹ اسٹاف رپورٹر محمد فرید صدیقی نے نمایاں طور پر شرکت کی۔

 

تقریب سے خطاب کرتے ہوئے پریس کلب صدر نریندر چاری اور سینئر صحافیوں نے تمام میڈیا برادری کو یومِ آزادی کی مبارکباد دی اور ملک کی آزادی کے لیے قربانیاں دینے والے مجاہدینِ آزادی کو خراجِ عقیدت پیش کیا۔ مقررین نے اس بات پر زور دیا کہ صحافت جمہوریت کا ایک اہم ستون ہے، اور عوام کے مسائل کو بے باکی سے اجاگر کرتے ہوئے سماجی ترقی میں مثبت کردار ادا کرنا ہر صحافی کی ذمہ داری ہے۔

 

پروگرام کے اختتام پر محمد فرید صدیقی اور دیگر صحافی نمائندوں نے صحافتی یکجہتی، سچائی اور دیانت داری کے ساتھ اپنے فرائض نبھانے کا عزم کیا۔ بعد ازاں تمام شرکاء میں مٹھائیاں تقسیم کی گئیں اور ایک دوسرے کو آزادی کی مبارکباد پیش کی گئی۔