گجرات میں خوفناک سڑک حادثہ ، کار کی آئیل ٹینکر سے ٹکر کے نتیجہ میں 10 افراد ہلاک
احمد آباد _ 17 اپریل ( اردولیکس ڈیسک) گجرات میں ایک بڑا سڑک حادثہ پیش آیا ہے۔ احمد آباد وڈودرا ایکسپریس وے پر انتہائی تیز رفتاری سے سفر کرنے والی ایک کار نے پیچھے سے آئل ٹینکر کو ٹکر مار دی۔ جس کی وجہ سے کار میں سوار تمام 10 افراد کی موت ہو گئی ہے، جب کہ کچھ دیگر افراد زخمی بتائے جا رہے ہیں
۔ پولیس کا کہنا ہے کہ عینی شاہدین نے بتایا کہ حادثے کے وقت کار کی رفتار بہت تیز تھی۔ خیال کیا جا رہا ہے کہ تیز رفتاری کے باعث ڈرائیور کار پر قابو نہیں رکھ سکا اور آگے جا رہے ٹرک سے ٹکرا گیا۔ پولیس کا کہنا ہے کہ تصادم کے نتیجے میں ہونے والے جان لیوا زخموں کی وجہ سے 8 افراد موقع پر ہی دم توڑ گئے، جب کہ دو افراد شدید زخمی ہوئے۔ حادثے کی اطلاع ملتے ہی 108 ایمبولینس سروس کی دو گاڑیاں موقع پر پہنچ گئیں، جہاں سے زخمیوں کو اسپتال منتقل کیا گیا۔
دونوں افراد اسپتال میں دوران علاج دم توڑ گئے۔
حادثہ اس وقت پیش آیا جب کار ایکسپریس وے پر وڈودرا سے احمد آباد کی طرف جارہی تھی۔ حادثے میں ملوث کار کا نمبر GJ 27 EC 2578 ہے، جو احمد آباد کے رہنے والے کرن گریش بھائی بھٹ کے نام پر رجسٹرڈ بتایا جاتا ہے۔ پولیس نے عینی شاہدین کے حوالے سے بتایا کہ حادثہ انتہائی خوفناک تھا۔ حادثے میں کار مکمل طور پر تباہ ہو گئی ہے۔
ایکسپریس وے پر حادثے کے بعد وڈودرا سے احمد آباد تک سڑک پر طویل ٹریفک جام ہوگیا۔ پولیس کے علاوہ ایکسپریس وے ہائی وے پٹرولنگ ٹیم بھی موقع پر پہنچ گئی۔ کسی طرح پولیس اور ہائی وے پٹرولنگ نے ٹریفک جام کو صاف کیا اور گاڑیوں کی آمدورفت دوبارہ شروع کی۔ یہ معلوم نہیں ہو سکا کہ حادثے میں مرنے والے افراد کا تعلق ایک ہی خاندان سے تھا یا ان کا تعلق مختلف خاندانوں سے تھا۔
