دیورانی کے 20 لاکھ کے زیورات پر جیٹھانی کی نظر، 4 گھنٹے میں چوری کا راز فاش
اترپردیش کی سنبھل پولیس نے دیورانی کے زیورات چوری ہونے کے معاملے کا صرف چار گھنٹے میں پردہ فاش کرتے ہوئے جیٹھانی کو گرفتار کرلیا۔ پولیس کے مطابق چوری کیے گئے زیورات کی مالیت 20 لاکھ روپے سے زیادہ ہے۔ واقعہ ہفتہ کی صبح تقریباً 5 بجے پیش آیا، جبکہ پولیس نے اتوار کی دوپہر تقریباً 2 بجے معاملے کا انکشاف کیا۔ پولیس نے ملزمہ کے قبضے سے تقریباً 18 لاکھ روپے مالیت کے سونے اور چاندی کے 23 زیورات برآمد کیے ہیں۔
یہ واقعہ ضلع ہیڈکوارٹر بہجوئی تھانہ حدود کے نارائن ٹولہ، فقیروں کی مڑھیا اور ٹنکی محلہ میں پیش آیا۔ ٹریکٹر مکینک محمد علی عرف گاندھی کے گھر سے زیورات چوری ہونے کی اطلاع پولیس کو ملی تھی۔
محمد علی کے بڑے بیٹے ارشاد علی نے ہفتہ کی صبح تقریباً 6 بجے ڈائل 112 پر پولیس کو اطلاع دی۔ پولیس کے پہنچنے پر اس نے بتایا کہ اس کے والد بدھ سے کلیئر شریف گئے ہوئے ہیں۔ گھر میں وہ، اس کا بھائی سرتاج علی، والدہ، دونوں بہوئیں اور بچے موجود تھے۔
ارشاد کے مطابق رات تقریباً 12 بجے تک پورا خاندان ایک ساتھ بیٹھا تھا، جس کے بعد سب الگ الگ کمروں میں سونے چلے گئے۔ سرتاج اپنی والدہ کے ساتھ پڑوسی مکان میں بندھی بھینسوں کے پاس سو گیا، جبکہ ارشاد اپنی اہلیہ کے ساتھ گھر کے اندر سو رہا تھا۔ اہل خانہ کے مطابق رات میں کسی قسم کی آواز یا شور سنائی نہیں دیا۔
ایس پی وکاس چندر ترپاٹھی نے بتایا کہ اے ایس پی اور سی او کی نگرانی میں پولیس نے موقع پر پہنچ کر اہل خانہ اور آس پاس کے لوگوں سے الگ الگ پوچھ تاچھ کی۔ تفتیش کے دوران پولیس کو گھر میں کسی بیرونی شخص کے داخل ہونے کے شواہد نہیں ملے، جس کے بعد شک گھر کے ہی کسی فرد پر گیا۔
پولیس نے کال ڈیٹیل کی جانچ کے بعد ارشاد علی کی اہلیہ مہک سے سختی سے پوچھ تاچھ کی۔ پولیس کے مطابق پوچھ تاچھ کے دوران مہک نے زیورات چوری کرنے کا اعتراف کرلیا۔
پولیس کے مطابق مہک نے بتایا کہ اس کے نکاح کے وقت سسرال والوں نے اسے زیورات دیے تھے۔ بعد میں دیور سرتاج علی کی شادی کے موقع پر یہ زیورات اس کی اہلیہ کو پہنا دیے گئے۔ مہک کا کہنا تھا کہ بار بار مانگنے کے باوجود اسے زیورات واپس نہیں کیے گئے، جس پر وہ ناراض تھی۔
پولیس کے مطابق مہک نے 2 اکتوبر کی رات زیورات چوری کرنے کا منصوبہ بنایا اور دیور کے کمرے سے سونے اور چاندی کے زیورات چوری کرکے اپنے کمرے میں دروازے کے پیچھے کپڑوں کے ہینگر میں چھپا دیے۔
ایس پی وکاس چندر ترپاٹھی نے بتایا کہ ملزمہ مہک، اہلیہ ارشاد علی، کو گرفتار کرلیا گیا ہے۔ اس کے قبضے سے تقریباً 18 لاکھ روپے مالیت کے سونے اور چاندی کے 23 زیورات برآمد ہوئے ہیں۔ پولیس نے قانونی کارروائی مکمل کرنے کے بعد ملزمہ کو عدالت میں پیش کردیا۔
