حیدرآباد میں نقلی ایر فورس آفیسر گرفتار

حیدرآباد ۔ سکندرآباد پریڈ گراؤنڈ کے قریب خود کو ہندوستانی فضائیہ کا افسر ظاہر کرکے لوگوں کو دھوکہ دینے والے ایک شخص کو پولیس نے گرفتار کرلیا۔

دفاعی سرگرمیوں کے باعث اہم سمجھے جانے والے مصروف علاقے میں اس واقعے کے سامنے آنے سے سنسنی پھیل گئی۔پولیس کے مطابق گرفتار شخص کی شناخت بہار کے رہنے والے نتیش کمار پال کے طور پر ہوئی ہے۔

وہ فی الحال حیدرآباد میں مقیم ہے اور روزگار کے لیے ڈیلیوری ایجنٹ کے طور پر کام کرتا ہے۔پولیس کو اطلاع ملی تھی کہ مذکورہ شخص خود کو فضائیہ کا افسر ظاہر کرکے معصوم لوگوں کو دھوکہ دے رہا ہے۔ اطلاع ملنے کے بعد پولیس نے کارروائی کرتے ہوئے اسے حراست میں لے لیا۔

پولیس نے بتایا کہ اس معاملے میں بیگم پیٹ پولیس اسٹیشن میں مقدمہ درج کرلیا گیا ہے۔ ساتھ ہی اس بات کی بھی تحقیقات کی جارہی ہے کہ آیا اس فرضی افسر کے پیچھے کوئی منظم گروہ تو موجود نہیں۔