حیدرآباد میں غیر قانونی شراب کی دکان چلانے والی خاتون کے خلاف PD ایکٹ کے تحت کاروائی
حیدرآباد: بورابنڈہ پولیس نے غیر قانونی طور پر شراب فروخت کرنے والی 45 سالہ ویمولا سرلہ کے خلاف تلنگانہ پریوینشن آف ڈینجرس ایکٹیویٹیز ایکٹ (PD Act) کے تحت کارروائی کی ہے۔
پولیس کے مطابق بورابنڈہ کی سرلہ گزشتہ چند برسوں سے غیر قانونی بیلٹ شاپ چلا رہی تھی اور اس کے خلاف غیر قانونی شراب فروخت کرنے کے متعدد مقدمات درج ہیں۔ مسلسل غیر قانونی سرگرمیوں کے پیش نظر پولیس نے PD ایکٹ کے احکامات پر عمل درآمد کیا۔
پولیس نے غیر مجاز طور پر شراب فروخت کرنے والوں کو خبردار کیا ہے کہ وہ فوری طور پر یہ سرگرمیاں بند کریں ورنہ تلنگانہ ایکسائز ایکٹ کے تحت مقدمات درج کرنے کے ساتھ عادی ملزمین کے خلاف PD ایکٹ بھی نافذ کیا جائے گا۔ بیلٹ شاپ کے لیے جگہ فراہم کرنے والوں کے خلاف بھی کارروائی کی جائے گی۔
پولیس نے عوام سے اپیل کی ہے کہ غیر قانونی شراب فروخت کی اطلاع ڈائل 112 پر دیں۔ اطلاع دینے والے کی شناخت خفیہ رکھی جائے گی۔
