تلنگانہ میں ووٹر لسٹ کا ’سرجیکل اسٹرائیک‘، 73 لاکھ نام کٹ گئے؛ حیدرآباد ضلع میں 19 لاکھ ووٹرس غائب
تلنگانہ میں ووٹر لسٹ پر بڑی صفائی، 73.39 لاکھ نام حذف؛ حیدرآباد میں سب سے زیادہ 19.41 لاکھ ووٹر کم
تلنگانہ بھر میں ووٹر لسٹ کی خصوصی جامع نظرثانی (SIR) کے دوران تقریباً 73.39 لاکھ ووٹروں کے نام مسودہ فہرست سے حذف کردیئے گئے ہیں۔ ان میں بنیادی طور پر غیر حاضر افراد، مستقل طور پر رہائش تبدیل کرنے والے، ایک سے زائد مقامات پر نام درج رکھنے والے اور فوت شدہ افراد شامل ہیں۔
اس عمل کے بعد ریاست کے تمام اضلاع میں ووٹروں کی تعداد میں نمایاں کمی آئی ہے۔ سب سے زیادہ نام حیدرآباد ضلع میں تقریباً 19.41 لاکھ حذف کئے گئے۔ ان میں 1.56 لاکھ فوت شدہ، 2.99 لاکھ لاپتہ، 13.45 لاکھ مستقل طور پر دوسری جگہ منتقل ہونے والے اور تقریباً 99 ہزار ایسے افراد شامل ہیں جن کے نام دوسری جگہوں پر بھی درج تھے۔
حیدرآباد کے اسمبلی حلقوں میں جوبلی ہلز میں 1.79 لاکھ، ملک پیٹ میں 1.47 لاکھ اور مشیرآباد میں 1.40 لاکھ نام حذف کئے گئے۔ سب سے کم حذف کئے گئے نام چارمینار حلقے میں ہیں، جہاں تقریباً 94 ہزار نام فہرست سے نکالے گئے۔
فیصد کے اعتبار سے بھی مشیرآباد میں تقریباً 45.17 فیصد اور ایک دوسرے حلقے میں 44.76 فیصد نام حذف کئے گئے، جبکہ بہادرپورہ میں سب سے کم 34.57 فیصد حذف کئے گئے۔
حیدرآباد کے بعد رنگاریڈی ضلع میں 12.87 لاکھ اور میڑچل-ملکاجگیری ضلع میں 10.71 لاکھ نام حذف کئے گئے۔ سب سے کم یادادری-بھونگیر ضلع میں تقریباً 26 ہزار نام حذف ہوئے۔
SIR نظرثانی کے بعد تلنگانہ میں ووٹروں کی مجموعی تعداد 3.38 کروڑ سے گھٹ کر 2.64 کروڑ رہ گئی ہے۔ مجموعی طور پر صرف حیدرآباد، رنگاریڈی اور میڑچل-ملکاجگیری اضلاع میں تقریباً 43 لاکھ ووٹر مسودہ فہرست سے غائب ہوگئے ہیں۔
